Sa matag higayon nga bendisyonan ko ang mga bata, daghan kanila human maigo sa pinisik sa bendita ang igo lang mokatawa.
Pahiyom dinhi ug didto inubanan sa dagandagan nga way sama. Tinuod dunay mga higayon nga kita sapoton gumikan ning mga bata nga gasamoksamok kanato tungod kay gusto lang nila ang pakigduwa.
Apan luyo sa maong pagpangulit anaa ang pagtulon-an nga nagdagpit kanato sa kinabuhing yano ug simple nga gihikaw nato sa atong kaugalingon sa dihang gihimo natong komplikado ang tanan.
Ako silang gipahiyoman ug gihagwa ug mao tingali kini ang hinungdan kun nganong asa kami magkita mapahiyumon silang mosinggit: “Father!”