Enero 27, 2019: Ikatulong Domingo sulod sa tuig
MGA PAGBASA: Neh. 8;2-4,5-6,8-10/Sal. 19/1 Cor. 12;12-30/Lk. 1;1-4,14-21
Gibati og tumang kahingangha ang mga tawo sa dihang namati sila sa gipamulong sa anak sa panday nga si Jesus. Iyang giako nga siya mao ang katumanan sa mga panagna ni Isaias diin iyang hatagan og kagawasan ang mga nabilanggo, panan-aw sa mga buta ug paglakaw sa mga bakol. Nga sa ato pa siya mao ang gihandum nga Mesiyas alang sa tanan.
Ang maong panlantaw mao man ang gipangindahay sa kadaghanan gikan kaniadto ug gani hangtud karon. Daghan nato ang nahimo gihapong mga binilanggo mismo sa bilanggoan nga kita ang naghimo.
Ang sayop nga panlantaw, ang dili himsog nga pagbati, ang kabuta sa kamatuoran mao man ang babag sa atong tinud-anay nga kagawasan. Si Jesus nahimong gawasnon sa iyang kaugalingon sanglit iya mang gibarugan ang iyang pagtulon-an hangtud sa katapusan. Gidapit kita niya nga sa pagkahimong gawasnon kini nagkinahanglan og pagtuo nga komibisido kita sa atong gibarugan.