Ang pagbanhig sa grupo ni Mayor Lakambini Reluya sa San Fernando sa habagatang Sugbo, nga nisangpot sa kamatayon sa iyang bana ug laing duha ka kauban, makapahinumdom sa mga Sugbuanon nga wa sila tug-ani sa kapolisan sa tinuod nga kahimtang sa kahusay ug kalinaw.
Mas makapa-alarma kay sa kainutil sa mga polis sa pagdakop sa mga responsable ug pagsulbad sa nagkataas nga listahan sa mga kaso mao ang nag-ngutngot nga pagduda nga may badlungon silang mga opisyal ug mga sakop nga mao ra say nagpasiugda sa sunudsunod nga duguong mga panghitabo.
* * *
Dakong baligho nga nisulbong ang way kasulbaran nga mga krimen human pasaligi ang katawhan nga makalingkawas na sila gikan sa kriminalidad tungod sa hiningusgang kampanya batok sa ilegal nga drugas.
Gisaaran pa gani ta og lugway: Luwas na ta tulo ka buwan human makabanos sa gahom ang bag-ong pamunoan.
Karon, igo na lang tang giingnan nga mas seryuso diay ang problema kay sa nahauna nilang pangagpas.
Naghisgot na gani sa kahigayonan nga unya na hingpit nga masulbad ang problema sa drugas sa kataposang adlaw sa ilang termino sa 2022.
* * *
Apan ang kampanya sa drugas maoy gihimong hapin sa inadlaw nga pinatyanay sa niaging duha ug tunga ka tuig.
Gipasabot ang katawhan nga di sila angayng mabalaka sa pagpanghay-ad sa mga patayng lawas sa kadalanan kay ang mga biktima pulos durugista nga nisukol sa kapolisan.
Gipahibawo sa kapolisan ang Korte Suprema sa niaging tuig nga kapin sa 20,000 ang nangamatay tungod sa drugas.
Inay maibanan nisamot hinuon kadaghan ang drugas, daghang salamat sa binilyon ka pesos nga balor sa shabu nga gipalusot sa taga Bureau of Customs (BOC).
* * *
Sa nangaging mga semana, nipasangil ang kapolisan nga nag-unay nang mga sindikato sa drugas. Bisan unsa pay nahitabo, nganong pabilin mang inutil ang mga polis sa pagbadlong o pagdakop sa mga nagpasiugda?
Atubangan sa duha ka semanang lugway pagsulbad sa pagbanhig ni Reluya, sayon ra alang sa kapolisan ang pagtumbok kinsay responsable. Gipatumaw dayong ngan ni Franz Sabalones nga human niangkong drug lord ilang gibuhian. Pasayloa ang katawhan nga nagduda na nga mga polis inay maninuod pagpatuman sa balaod nagtahi na lang og mga istorya.
* * *