Bag-ong Bino, bag-ong sudlanan, Bag-ong Tuig

Pagkatakdo sa duha ka tudlo tumong sa alas 12:00 nga takna pagsugat sa Bag-ong Tuig, humok napunggak ang kataposang panid sa kalendariyo 2018 ug gilupad-palid tipon niadtong dili na nato mahikap nga kagahapon.

Sa iyang pagkanaw ngadto sa nagkalayong dapit, igo na lang ta pagsud-ong sa maong panid nga maoy gikargahan sa tanan tang nabuhat tibuok tuig ug sa inisang mga kamot, kita miwarawara dungan ang pagsinggit: “Goodbye, Tuig 2018 ug Welcome, Year 2019.

Our dear Banat News readers, ania na ang tukmang adlaw nga gihatagan ta sa atong Magbubuhat og laing kahigayonan aron kita mahibalik Kaniya ug maangkon ang way kataposang kalipay pinaagi sa pagbag-o na sa atong kinabuhi. 

Unya may listahan na ba mo sa inyong New Year Resolution (NYR)?

Diha sa listahan, giapil ba ninyo ang pagkat-on nag basa sa Bibliya ug likayan nang pagsigeg tan-aw og mga For Adults Only nga salida? 

Usab, giapil ba ninyo ang pagsimba na kanunay matag Domingo ug Pistang Iglilihi, diin sa miaging tuig kaduha ra gyud mo kasulod og simbahan kay maoy gipalabi ang paggakos sa kahilayan?

Ang pagkagumon sa gidiling drugas, ang dili kaantigo mosunod bisan sa simpleng balaod sama sa pagdili na sa pagpabuto panahon sa Pasko ug Bag-ong Tuig, naapil ba sab sa saad nga hunongon na kini sa hingpit?

Nindot unta, kun ang sudlan  sa atong NYR, bag-ong sudlanan.

Ilabay na nato ang daan sa basurahan kay gilubloban sa bagang buling.

Mas maayo gyong bag-o kay limpyo ug wala pa mahilabti.

Gani, miingon man si Hesukristo ngadto sa iyang mga tinun-an: “Walay mobutang og bag-ong bino sa daang sudlanan.

Kun buhaton ni, buk-on sa bag-ong bino ang mga sudlanan ug mausik ang bino lakip na ang sudlanan. Hinunoa, ibutang ang bag-ong bino sa bag-ong sudlanan.”

Nga sa ato pa, kun seryoso kita sa atong NYR, dapat ikompisal-bubo gyud ang tanan natong sala sa Ginoo ug mangayo’g pasaylo Kaniya.

Dihang madawat na nato ang Iyang pasaylo, nalabay na ang daan tang sudlanan sa mga sala ug gipulihan sa bag-ong sudlanan nga puno sa kalinis.

Ug angay ampingan gayod nga dili na magkahugaw sa tanang panahon.

Kaya ba? Ato ning kayahon!