Pagpanalipod sa atong kabilin
Daghang nakabasa sa akong lindog mahitungod sa kontrobersiyal nga hukom sa kadagkoan sa Artsidyosesis sa Sugbo sa pagguba sa kapin na sa unom ka dekada nga building sa Patria de Cebu aron nga paabangan ug negosyuhon ang luna nga wa kapugong sa ilang kaugalingon ug nipadayag sa ilang pagsupak.
Pipila nila mga anak ug mga apo sa mga tinun-an nga determinadong nibuntog sa tanang kakulian aron lang matukod ang makasaysayanon nga istruktura.
May nag-text, nag-email, nanawag sa telepono, ug may nakigkita gyud nako sa sibyaanan.
Labing nakadapit nako ang suwat nga kinamot ni Ann Kintanar nga suwayan nako og Binisaya:
* * *
“Dungganan ang kawsa apan mas dungganan pa gyud unta ang kasulbaran.
Dungganan ug tukma ang pag-atiman sa masakiton nga kaparian ug pagbayad sa mga panginahanglan sa ilang kahimsog.
Apan mas dungganan ang paghimo sa maayong buhat sa way pagguba sa kasaysayan, sa kultura ug sa pagsalig sa Simbahan.
“Ang pangangkon mao nga ang Patria de Cebu imposible nang maluwas kay di makasugakod sa linog. Matinahuron kong mangutana, nangayo ba sila og ikaduhang opinyon o ikatulo?
Ug ning ika-21 nga siglo, wa bay mga arkitektong makapalig-on sa 64 anyos nga Patria?
* * *
“Ang ngan puno sa kahulogan: Patria, Nasud. Uban ang gugma sa nasud, angay unta tang modapig sa atong nasud.
Sama sa gihimo sa mga Italyano sa ilang paghago pagluwas sa naghirig nga torre sa Pisa nga ilang napatuyhad og upat ka centimetro sa paghirig ini duha ka siglo na ang nilabay.
“Ang Patria wa gani maghirig. Morag ang naghirig mao ang kadagkoan sa Simbahan, nihirig paingon sa laktod nga pagguba sa Patria alang sa panguwarta sa developers.
* * *
“Apan di ba nga unahon man unta ang pagluwas sa labing bililhon nato nga mga kabilin? Makakuwarta bitaw gihapon sila sa bakanteng mga luna sa way pagtandog sa labing mahinungdanong mga bahin sa Patria.
“Makaayo sa negosyo ang paghupot og konsiyensiya sa patigayon.
Ug makaayo sa tanlag sa kadagkoan sa Simbahan ang pag-amuma sa masakiton nga mga pastol sa way pagsalikway sa ilang mga karnero pinaagi sa pagguba sa kulturanhon nga kabilin, sa hinugpong nila nga paghinumdom ug makapatandog sa balatian nga kasaysayan.”
* * *
- Latest
