May mahinungdanon kong adtoon unta sa dakbayan sa Sugbo. Apan matag sakyanan nga moagi sa mga pasahero namungingit. Hapit ko mag tulo ka oras og pinaabot makasakay lang gyud ko tawon.
Apan subo na lang palandungon nga wala gihapon ko makasakay.Ug kay nahadlok man kong ma-late sa schedule inig ka gabii mao nga nakahukom na lang kong mobalik na lang sa agi. Wala koy mahimo ning maong sitwasyon kay bisan unsaon lisud gyud kaayo kun pugson.
Ingon ini sab ang atong kinabuhi. Magdali kita tungod kay buot kita og daghang mga accomplishments apan ang maong kaikag napukan sa dihang nakita nato nga daw mapakyas kita gumikan ning maong sitwasyona.
Ang pagpailob birtud. Ang pagpaabot gahom nga mahimong mousab sa kalibutan nato.
Nagpadayag lamang kini nga ang tanan may kaugalingong dalan diay nga gisubay.
Buot ko untang magdali apan ang maong pagdali maoy nibitad kanako sa paghinay aron mopahulay sanglit ning kalibutan nato karon gikinahanglanon gyud kaaayo ang lahutay.
Lintunganay
Ni Fred Landuigo
Hara-hara sa Kapitolyo
Nganong daw sa naghara-hara ang administrasyon ni Gobernador Hilario Davide III ug ang iyang mga kaalyado sa Cebu Provincial Board nga masugdan dayon ang P1.3 bilyones nga Capitol Resource Center? Unsay nakadinalian sa maong proyekto nga kinahanglan gyud nga mopatawag og special session ang hunta probinsiyal aron tuki-on ang resolution paghatag og pagtugot sa gobernador aron mopirma og kontrata uban sa mananaog sa bidding.
Duna bay schedule nga gi-apas ang Kapitolyo nga kinahanglang mahuman dayon ang proyekto o giapas nila nga dili maabtan sa election ban? Niining gipakita nga kaikag sa administrasyon ni Davide ug sa iyang mga kaalyado sa Provincial Board nga dali-on ang proyekto makapaturok sa pagduda unsay nagpahipi nga motibo.
Dili kaha pundo maoy ilang giapas aron magamit sa eleksiyon? Ang kantidad sa proyekto mokabat og P1.3 bilyones, kun atong nuntan ang giingon nga 10 porsiyento nga standard nga komisyon sa mga proyekto sa gobyerno sa ato pa dunay labing minus P130 milyones nga posibling ilang masapi.
Dili kabasol ang mga opisyal sa Kapitolyo labi pa ang mga nangusog nga masugdan ang proyekto kun bati-on og katahap ang publiko sa ilang motibo. Dili man gud kasarangan nga mohimo gyud sila og special session bisan og unta tingbakasyon na aron lang gyud iduso ang pagpatuman sa proyekto.
Sa akong naobserbahan ang pagpatawag og special session himuon lang sa mga higayon nga dunay dinalian nga panginahanglan. Pananglitan dunay dakong katalagman nga nagkinahanaglan og aksiyon sa konseho o sa hunta probinsiyal aron mapadali ang hinabang. Pero pagtukod og 20 ka andana nga edipisyo kinahanglan og special session?
Gawas pa dili ni maoy nag-unang panginahanglan sa probinsiya. Daghan ang kadalanan nga napasagdan didto sa kabukiran. Dili nalang ko mohisgot legal ba o dili ang katukuran niini sumala sa nalatid sa balaud nga maoy gipatubaw karon sa National Historical Commission of the Philippines.
Ang labing mahinungdanon nga punto alang nako makiangayon ba nga unahon ang pagpatukod sa maong edipisyo kay sa panginahanglan sa mga magbubuhis?