Dako ang kahigayonan nga masayop na sang pangagpas sa economic managers ni Presidente Rodrigo Duterte. Nga padayong motibugsok ang presyo sa lana sa bag-ong tuig. Sama nga sayop ang ilang pasalig nga motibugsok ang presyo sa lana karong tuiga, sa unang tuig sa pagpahamtang sa excise tax sa lana ubos sa Tax Reform for Acceleration and Inclusion (TRAIN) Law.
Kay karong semanaha, human sa walo ka sunudsunod nga semana sa pagtibugsok, mosakang presyo sa gasolina. Bisan mobaratong krudo ug kerosene, gikahadlokan nga sinugdanan ni sa sunudsunod nga pagsulbong sa presyo.
* * *
Nakabawi ang presyo sa lana human nagkauyon ang mga sakop sa Organization of Petroleum Exporting Countries (OPEC) nga gipangulohan sa Saudi Arabia ug non-OPEC countries nga gipangulohan sa Russia sa paglaslas sa ilang produksiyon sa lana og hangtod sa 1.2 milyones ka baril matag adlaw. Kon matuman ang kauyonan, nga ibanan og 800 milyones ka baril matag adlaw ang produksiyon sa OPEC ug pul-ongan og 400 milyones ka baril matag adlaw ang produksiyon sa non-OPEC countries, masaligon ang mga eksperto sa industriya sa lana nga magsige og saka ang presyo.
* * *
Sukwahi sa pangangkon sa economic managers ni Presidente Duterte nga mas barato na ron ang lana kay sa wa pa mapatuman ang TRAIN Law, gibutyag sa Department of Energy (DOE) nga gikan sa Enero 1 hangtod sa Disyembre 4 mas daghan gihapon ang uminto kay sa us-os karong tuiga:
Ang gasolina gipausbawan og ka-30 ka higayon (P21.17 matag litro) ug gipa-us-osan og ka-18 ka higayon (P18.65 matag litro); ug
Ang krudo gipausbawan og ka-30 ka higayon (P22.30 matag litro) ug gipa-us-osan og ka-19 ka higayon (P17.60).
* * *
Gawas nga mahimong sayop nilang pangagpas, gilawogan ba sab sa economic managers og sayop nga kasayuran si Presidente Duterte? Nagkadugay, ang sinultihan nilang Finance Secretary Sonny Dominguez ug kaubanan mora nang mga propagandista, inay ekonomista.
Magpaugat ba gihapon sa ilang hukom nga, inay suspensuhon, ihinayon pagbunal ang laing P2 nga patong sa matag litro sa krudo ug gasolina sugod karong Enero 1? O mobakwi sa ilang binuang ug mokumpisal na nga dakong binuang ang pagbuhis sa mga produkto kansang presyo di nila makontrolar?
* * *