EDITORYAL – Kun duna lang unta

Dili na mapugngan ang pagsulbong ug pagsaka og maayo sa ekonomiya sa Metro Cebu ug sa tibuok lalawigan sa Sugbo sa umaabot nga mga panahon bisan si kinsa pa may mamahimong presidente sa nasud.

Makita karon palang ang mga daw uhong nga nanurok kining mga tag-as nga mga buildings dili lang sa Metro Cebu kondili bisan na gani sa mga component cities ug mga lungsod sa duol sa mga siyudad.

Nagpasabot kini nga dakong buhi ang komersyo. Kun may komersyo may mga tawo ug kun may mga tawo nagkinahanglan og transportasyon ug kun may transportasyon kinahanglan nga dunay imprastraktura.

Kun ang Cebu aduna pay railway system, light rail transit, metro rail transit o monorail system 20 ka tuig na ang nakalabay, tingali nadoble pa ang kalamboang naabot karon sa Sugbo.

Pinaagi niini mapugos gyud ang mga local officials pagyangungo sa nasudnong kagamhanan pagpatukod og dugang imprastraktura.

Kini sama sa mga mas lagpad nga mga dalan, tag-as ug lagpad nga super-highways, lagyo ug lagpad nga flyovers ug mga subway tunnels nga magkonektar sa tanang mga siyudad ug kalungsoran alang sa mas paspas nga biyahe.

Apan ang labing maayo gyud unta mao ang pagtukod og mga habog ug tag-as nga skyways o flyovers nga magkonektar sa south ug sa northern Cebu apan may mga entrances ug exits padung sa mga siyudad sa Metro Cebu ug matag lungsod nga maagian.

Kini aron pananglitan kadtong taga Mandaue City nga dunay tuyo sa Talisay City dili na kinahanglang motadlas pa kadalanan sa siyudad sa Cebu City.

Makapausab kini sa kinatibuk-ang dagway sa usa ka lugar, apan dili aron mabati tanawon kondili mahimong moderno ug sopistikado ang usa ka dapit nga mabutangan niini.

Pinaagi niini kadtong mga sakyanan nga padung sa south gikan sa north nga way tuyo sa Metro Cebu mahimo rang makalahos nga way daghang agiang eskina kay toa ra sa ibabaw mag-agi.