Nakasimba ko sa alas 6:00 sa buntag nga misa ni Fr. Romeo ‘Dodong’ Desuyo, diin iyang gipasabot sa katawhan nga kining unang Domingo sa Adbiyento, Disyembre 2, mao ang Bag-ong Tuig sa Simbahang Katoliko.
Busa, angay lang usab unta nga andamon ang espirtuhanong kinabuhi ning mga adlaw nga atong gipaabot ang kasumaran sa pagpakatawo sa Mesiyas, kinsa nagdalag pinaskohan natong tanan nga mao ang kaluwasan.
Matud ni Fr. Dodong, bukas alang sa tanan ang ganghaan sa kompisalan sa Guadalupe Parish Church gikan sa Lunes ngadto sa Sabado matag 5:00 pm hangtod alas 6:00 sa hapon, apan subo palandongon kay sa iyang pagpinaabot kanilang buot mangandam ning pag-anhi sa Manluluwas, usa ra gyuy isog nga miluhod sa kompisalan, mihuho sa tanang sala ug misaad nga dili na magpakasala pag-usab aron makakaon na sa pan sa kinabuhi diha sa talad-Eyukaristiya nga dugay nang wala niya makaon.
Pastilan, no? Sa kadaghang tawo sa Guadalupe, usa ray mikompisal?
Unya, ngano man lagi nga ini’g tiyempo sa pagpangalawat magpanon man ang mga anino nga modawat-lamoy sa sagradong ostiya nga itunol sa pari?
Dinhi, mipaambit si Fr. Dodong niadtong pahimangno sa obispo: “Nga kun ikaw mokalawat nga walay kompisalkompisal, sama ra nga imong giunay pagtukmod ang kaugalingon nimo ngadto sa impiyerno.” Hala, no?
Unya, gisingit ni Fr. Dodong kadtong lago nga tawo, kinsa miduol-sangpit niya human sa usa ka misa sa Domingo.
Abi niya’g mangayog kuwarta o pagkaon ang maong yagit kay sa iyang tan-aw, manghod la’g diyotay sa makililimos ang bayhon niini.
Apan daw mikayab iyang sotana paingon sa itaas dihang giingnan siya niini: “Mokompisal unta ko, Dre. May panahon ka ba?”
Pagkanindot nga ehemplo sa pagpangandam. Kay samtang ang mga adunahan nagkapulikig order in advance og litsong baboy, mahalong bino, imported fireworks ug uban pa alang sa Pasko, kining pobreng tawo, walay laing giandam, kondili – ang paglimpiyo sa iyang tanlag ug kalag nga nabulit sa mga sala, diin didto sa kahiladman niya, mitiyabaw iyang kasingkasing sa tumang paghinulsol.
Mga suking Banat News readers, sultian tamo. Mas malipay ang Ginoo sa matang sa pangandam nga gipili sa pobre, kay sa gi-order in advance sa mga sapian.