Makapahiubos kaayo sa mga kabus nga nagsalig sa bugas nga gibaligya sa National Food Authority (NFA) kining ilang planong patas-an ang presyo niini gikan sa P27 matag kilo himuong tag P33 ngadto sa P35.
Sumala pa sa kadagkoan sa NFA atol sa budget hearing sa Senado, ang NFA alkanse pirme sa ilang pagpamalit sa mga local nga tipasi sa bugas humay nga ilang galingon aron mahimong NFA rice.
Matud pa nga 65 porsiyento lamang sa ilang gigaling nga tipasi ang mahimong bugas nga ilang mabaligya sa mas baratong presyo ug sa maong paagi pirmeng alkanse ang NFA mao nga kinahanglang patas-an na ang presyo.
Ang laing rason matud pa nga nakita sa NFA nga wala raman kaayo mabug-ati ang mga konsumidor nga mamalit og commercial rice nga usahay moabot og kapin P50 ang matag kilo mao nga sa ilang tan-aw kon himuong P33 o P35 ang NFA rice dili lang usab niini manumbaling ang mga tawo.
Nalimot ba kaha ang NFA nga ang ilang bugas dili man maoy sagad paliton anang ilang gikomparar nga mga mamalitay og commercial rice sa inadlaw-adlaw nga pangkonsumo.
Nalimot ba kaha sila nga ang tigpalitan og NFA rice mao kadtong dili gyud maka-afford pagpalit og commercial rice tungod sa ilang kapobrehon ug gumikan kay mao ray maabot sa ilang kita matag adlaw?
Ang uban gani, tagtunga nalang ka kilong NFA rice ang paliton para sa ilang paniudto dala na ang panihapon tungod kay sa ilang pamahaw kondili busog sa hangin, bahaw nga kan-on sa nakalabay nga gabii ang ilang gikaon.
Maayo tingaling maghimo una sila og seryusong pagtuon bahin niini. Tinuod nga dili supak sa balaod nga ang usa ka ahensya sa gobiyerno mosulod og negosyo aron mokita, apan kana tingali kun ang negosyo dili makatandog sa mga kabus.