Nagdudang dunay laing babaye ang bana

Dear Atty. Divine:

Nagtuo ko nga ang akong  bana  adunay laing babaye. Kini tungod sa text nga akong nabasahan sa iyang cellphone nga gikan sa usa ka babaye nga diin akong nasabot sa mensahe nga aduna gyud silay relasyon. Akong gi confront ang akong bana niini apan iya kining gi deny. Matud niya nga wa siya makaila sa babaye nga nag text kaniya hinungdan nga wa kini niya tubaga. Ang akong pangutana kon pananglit akong masakpan ang akong bana nga aduna gyud siyay laing karelasyon pwede ba nako nga ikiha ang  babaye lang tungod sa iyang pagpakigrelasyon sa akong bana bisan kon kini minyo? Daghang salamat. — Karla

* * *

Dear Karla:

Kon ang usa ka minyo nga lalaki makigrelasyon og laing babaye mamahimo siyang ikiha og Concubinage basi sa  Art. 334 sa atong Revised Penal Code. Apan kinahanglan nga  duna gyud kay lig-on nga ebidensya pagmatuod nga  duna silay sexual relationship tungod kay usa kini ka kasong criminal ug proof beyond reasonable doubt ang gikinahanglan aron sila makombikto. Kinahanglan sab silang duha sa imong bana ug ang iyang babaye ang pasakaan og kaso ug dili mamahimong  ang babaye lang sa imong bana ang imong ikiha kay mao kanay nalatid sa balaod. Apan kon text message lang ang imong makuha nga ebidensya batok sa imong bana ug sa babaye dili  kana igo nga basihan aron sila makombikto dapat aduna ikaw convincing evidence nga moprubar sa imong pasangil ug magkompirmar sa ilang relasyon sama sa love letters, pictures nilang duha nga nag-uban ug uban pa. Thanks and God bless. — Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.