Pakasohan ni Duterte si Mayor Osmeña

Gibirahan na usab ni Pres. Rodrigo Duterte si Mayor Tomas Osmeña atol sa labing ulahing pagbisita sa presidente dinhi sa Sugbo niadtong miaging Miyerkules sa gabii.

Gipakigkitaan sa usa ka private dinner ni Duterte ang 70 ka mga lokal nga political leaders sa Sugbo nga gipangulohan nilang Bise Mayor Edgardo Labella nga kandidato pagka-mayor sa PDP Laban sa siyudad sa Sugbo ug Kongresista Gwen Garcia, kandidata sa maong partido pagka-gobernador sa lalawigan. Wala damha sa mga nanambong sa maong kalihukan nga hisgutan pagbalik ni Duterte si Tomas nga iyang giingnang tamparoson niadtong Agosto 30 nga charter day sa Mandaue.

Sa maong kalihukan, gimandoan ni Duterte si DILG Sec. Eduardo Año sa pagpasaka og kaso kang Tomas tungod sa iyang pagbuhi sa tulo la dinakpan sa Parian Police Station nga namaligya og butane canister.

Ang gipasabot sa presidente mao ang insidente niadtong Agosto 24 diin si Mayor Osmeña nakuhaan og CCTV sa kapolisan nga nangunay og buhi sa tulo ka dinakpan. Nangutana ang presidente ngadto sa mga political leaders kon labaw pa ba si Tomas sa balaod.

Unsa pa kahang kasoha ang ipasaka ni Duterte batok kang Tomas nga si Cebu City Police Office Director Royena Garma mipasaka naman og kasong kriminal ug administratiba batok sa mayor sa siyudad? Aw, kon sa Ombudsman gisang-at ang kaso batok sa mayor, mayak-an gyud kini kon dili aksiyonan sa Ombudsman Visayas nga si Elmer Clemente kay usa man kini ka appointee ni kanhi presidente Noynoy Aquino.

Naa naman nang kasong gipasaka ni Garma, ang mahimo ni Duterte mao ra gyud ang pag-pressure sa Ombudsman nga aksiyonan ang maong kaso. Kon molihok ang utang kabubut-on ni Clemente sa Dilawan, yak-an man gyud kini niya.

Dili pud tingali absuweltohon ni Clemente si Tomas kay puwerte man gyung lig-ona sa ebidensiya, ang CCTV diin na-rekord si Tomas nga personal nga mipabuhi ss tulo ka dinakpan. Ang mahimo ni Clemente mao ra gyud ang paglangaylangay pagpamasin nga adunay regime change.

Tingali, gusto sa presidente nga kasohan si Tomas og oppressive conduct o grave abuse of authority, mga cause of actions nga wala pa masang-at sa Ombudsman. Kining mga kasoha mahimong isang-at sa Office of the President ubos sa general supervisory power sa presidente sa mga opisyal sa lokal nga kagamhanan ubos sa Local Government Code of 1991. Tingali, gusto sa presidente nga iyang suspensohon si Tomas tungod sa maong kaso.

* * *

Naglagot ko nga nagsud-ong sa usa ka advertisement sa Facebook kalabot sa Angkas. Sumala pa sa maong ads, “Beat the Traffic.” Pastilan, dili gyud na angay pildehon ang trapik pinaagi sa bag-ong negosyo nga, bisan unsaon og bali-bali, usa ka ilegal nga klase sa transportasyon.

Ang habal-habal nagpabiling ilegal nga klase sa transportasyon. Hangtod karon, dakponon angay ang usa ka motorsiklo nga mamik-ap og pasahero.

Apan nganong gitugotan kini ni Mayor Osmeña dinhi sa siyudad sa Sugbo? Si Bobby Nalzaro sa iyang programa, ug bisan sa iyang lindog sa laing pamantalaan, nagkanayon nga ang Angkas negosyo sa anak sa mayor. Tinuod o dili, wala koy pamaagi pagsusi niini. Apan angay kini susihon kun tinuod ba gyud ning estoryaha.

Apan wala ba kamo magduda nganong kalit nga nahimong krisis ang trapik sa siyudad? Unya nadugang ang pag-introduce sa Angkas dinhi sa Sugbo?

Ang trapik angayan sulbaron dili negosyohon. Sa  laing pagka-estorya sa inengles, “don’t beat the traffic, solve it.” Maayo man gud kun sige ang krisis sa trapik sa siyudad, kay walay puas ang booking sa Angkas. Maayo ra ba og baynte-singkuwenta ang plete, labaw pa ra ba ni sila sa taxi, maayo ra ba og naay meter.

Kun magpabilin ang trapik sa siyudad, maadunahan ang tag-iya sa Angkas.