Imbestigasyon sa kongreso

Gireklamo ni Atty. Maria Lourdes Mangaoang ang pagtratar kaniya sa mga kongresista nga nagimbitar kaniya aron mahimong resource person sa gipahigayon niining inquiry kalabot sa nakalusot nga 6.8 bilyones ka pesos nga shabu ug sa pasangil niini batok ni Customs Commissioner Isidro Lapeña nga incompetent sa iyang trabaho.

Atol sa gipahigayon nga inquiry ang duha ka kongresista nga sila si Acop ug Barbers nahisama sa mga piskal o polis nga naghimo og imbestigasyon.

Ang Section 21, sa Article VI sa 1987 Philippine Constitution nagkanayon: The Senate or the House of Representatives or any of its respective committees may conduct inquiries in aid of legislation in  accordance with its duly published rules of procedure. The rights of persons appearing in or affected by such inquiries shall be respected.

Buot ipasabot ang Senado o ang Ubos Bay Balauranan o ilang mga komitiba mohimo og mga pagpangutana aron matabangan sila sa pagpanday og balaud pinasubay sa napublikar nilang patakaran. Ang katungod sa tawo nga giimbitahan o apektado sa gihimong pangotana kinahanglan nga respitohon.

Pero dili kini mao ang atong nakita sa mga gipahigayon nga mga Congessional inquiries maong naglibog ang mga tawo ug wala na makasabot.

Ilang pangutana, nakasabot ba kaha ang mga bagbabalaud sa nahisgotang gahom nga gihatag kanila sa Batakang Balaud.

Sa akong tanaw, murag wala makakita ang mga magbabalaud sa kalainan sa imbestigasyon ug inquiry. Ako nagtoo nga ang pagsabot sa mga magbabalaud sa inquiry kay imbestigasyon.

Ang imbestigasyon adunay interogasyon ug pagpanghulga. Ang inquiry, mangutana ug ang pangutana ibasi kini sa hitabo, numero ug lohika. Ang tumong ug tuyo sa pangutana mao ang pagsuta ug pagpangita sa tinuod ug pagila sa mga bakak.

Subo lang nga palandungon nga murag dili kini ang anaa sa huna-huna sa mga magbabalaud sa ilang paghimo sa mga Congressional inquiry.