Lingla-lingla pa’g may time

Ang mga orihinal nga Liberal Party dinhi sa Sugbo nag-aplay karon og taktika pagpalibog sa mga botante sa Sugbo.

Ang grupo nilang Bise Gobernador Agnes Magpale ug Mandaue Mayor Luigi Quisumbing nagsige og himo ug mga kalihukan nga nag-angkon nga kagrupo sila sa Hugpong Pagbabago ni Davao City Mayor Sara Duterte-Carpio.

Sama kagahapon, naghimo og kalihukan sa Kapitolyo kalabot sa federalism ang grupo ni Agnes ug Luigi. Tungod kay federalism, ilang giimbitar si Sec. Adelino Sitoy sa Presidential Legislative Liaison Office sa Malacañang.

Kay kini si Noy Ady maoy giila nga eksperto sa federalismo dinhi sa Sugbo ug giila na usab lukop Kabisay-an. Apan ang nahitabo, nahingangha si Noy Ady nganong adunay kalihukan sa federalismo ang grupo nilang Agnes ug Luigi. Apan sumala pa sa usa ka kasaligang tinubdan, wala tungaha ni Noy Ady Sitoy ang kalihukan nilang Agnes, Luigi, ug ni Gob. Junjun Davide kagahapon.

Katungod ni bisan kinsa ang maggrupo ug maghimo og kalihukan sama niining federalismo. Apan kon maghugpong na gani aron lang pagpangilad sa mga tawo nga kunohay kagrupo sila ni Pres. Rody Duterte ug ni Inday Sara, pagkadako gyud niining salawayon. Nganong dili man magtug-an sa tinuod silang Junjun ug Luigi nga mga orihinal silang kagrupo nilang Noynoy Aquino ug Mar Roxas, ug si Agnes kagrupo ni Grace Poe? Nganong magtakuban man silang mga sakop ss Hugpong Pagbabago nga wala man sila dawata sa Hugpong ni Inday Sara? Hinuon makasabot kita nganong daghang politiko nga magpapansin ni Digong. Kay karon lang bag-o, misaka ang trust rating sa presidente ngadto sa 74 porsiyento. Sa ato pa pito sa napulo ka Pilipino ang nagtuo sa presidente.

Apan ang wala matan-aw sa grupo ni Agnes nga dili na malingla ang mga tawo tungod sa social media. Bisan unsaon pa niya og papansin sa presidente, kahibalo ang mga tawo nga dili sensiro ang iyang pakiglambigit sa grupo ni Inday Sara kay para lang nga “makalingla” sa mga tawo nga padayong nagtuo sa presidente.

Kay kanus-a man nagsuporta si Agnes, Junjun ug Luigi kang Duterte? Sa miaging eleksiyon, si Agnes tua nagsuporta kang Grace Poe kay ang iyang pag-umangkon nga si Ace Durano maoy campaign manager ni Poe. Silang Junjun ug Luigi didto nagsuporta kang Mar Roxas. Wala gyuy mayor ug gobernador nga nagsuporta kang Duterte sa miaging eleksiyon. Pero sige nalang. Ang mga tawo ra gyuy maghukom. Apan ang ako lang, dili maayong manglingla sa mga tawo alang sa politikanhong interes.

Karon, akong pangutana: kanus-a man nagsuporta si Junjun sa federalism nga dako man siya ug ang iyang amahan nga si kanhi Chief Justice Hilario Davide Jr. nga supak niini? Nganong naa naman gyud sa Kapitolyo ang kalihukan sa federalismo? Kining maong kalihukan ilang gihimo usa ka adlaw human si Senador Grace Poe mipahibalo nga mo-file og resolusyon aron ipa-imbestigar ang giingong sigeng pinatyanay sa Sugbo.

Kinsay kauban ni Poe sa kalihukan niya dinhi sa Sugbo kanus-a niya gipahibalo ang pagsang-at sa resolusyon? Dili ba silang Agnes ug Junjun ang kauban ni Poe?

Ang kapin sa 200 ka mga patay nahitabo atol sa lehitimong operasyon sa kapolisan. Apan nganong disturbohon pa man ni Poe?  Ang pakiggubat batok ilegal nga drugas usa ka campiagn promise ni Duterte. Busa seryoso kaayo siya niini. Mao bitaw nga bisan giunsa siya sa pagsaway bisan sa international community, gibarugan kini sa presidente.

Apan nganong samokon man kini sa grupo nilang Poe? Ayaw ko’g ingna nga ang pulong ni Poe iya ra ug walay kalibutan si Agnes ug Junjun kay makapila na nila gikondenar ang mga anti-drug operations nga miresulta sa pagkamatay sa pipila. Busa kon dili silang Agnes, Junjun ug Luigi sa war on drugs sa presidente, nganong sige man sila magpapansin sa presidente pinaagi pagpalutaw nga kagrupo sila sa presidente ug sa anak niining si Inday Sara? Aw, sa mailad lang.