Palusot sa shabu sa Customs

Dugay na ko’ng nagsulat kalabot sa palusot sa ilegal nga drugas gamit ang Bureau of Customs. Karon lang panahona midako kay nagkasumpaki ang Customs Commissioner nga si Isidro Lapeña ug ang Deputy Collector nga si Atty. Lourdes Mangaoang.

Si Mangaoang nga eksperto sa X-ray sa customs, mibarog sa iyang findings nga adunay sulod kadtong magnetic lifters nga gimando ni Lapeña nga i-release.

Nagkasupaki si Lapeña ug Mangaoang kay miinsister man ang nahauna nga walay sulod ang magnetic lifters.

Apan kagahapon, nausab ang tonada ni Lapeña. Giangkon niini nga nagtuo siyang aduna gyuy sulod ang mga magnetic lifters nga gi-release ni Lapeña.

Nakaila ko ni Mangaoang tungod kay siyay Customs Collector sa dihang giimbestigahan ang pagsuway og palusot og pseudo-ephedrine nga precursor sa shabu dinhi sa Sugbo.

Gani si Mangaoang nagkasumpaki sa usa ka abogado nga kanhi hepe sa Customs Intelligence and Investigation Service nga maoy giingon nga contact sa smuggler sa maong mga pseudo-ephedrine.

Kon nakaila kamo ni John-John Osmeña, anak ni Toledo City Mayor ug kanhi senador Sonny Osmeña, siyay gitumbok nga contact sa usa ka “Mike Cummings” nga maoy nagpalusot sa maong mga kemikal nga hinuong shabu gikan sa Australia. Si John-John wala na makabalik sa Pilipinas.

Si Mangaoang usa ka eksperto sa X-ray tungod kay sa dihang na-institutionalize kini, usa siya sa mga opisyal sa customs nga gipadala sa gawas aron mag-training.

Si Mangaoang usab ang collector sa customs didto sa Zamboanga nga mipasaka og kaso sa usa ka Insik nga higala ni kanhi presidente Erap Estrada.

Busa, nagtuo ko nga ang pagsupak ni Lapeña sa findings ni Mangaoang mahimo makapa-“the end” sa iyang liderato sa adwana. Samot na nga ang iyang gibuhat mao ang pag-tabon sa mga drug smugglers.

* * *

Pagkahakog sa gahum ang seguradong nagtukmod nilang mga Konsehal Sisinio Andales ug Alvin Arcilla sa ilang pagdagan sa ika-upat nga termino.

Mapupos na unta ang termino nilang Andales ug Arcilla sa Hunyo sunod tuig tungod kay makatulo na silang na-elect isip mga konsehal sa amihanang distrito sa siyudad. Apan misang-at sila sa ilang sertipiko de kandidatura sa samang posisyon sa ika-upat na nga termino. Sumala pa sa duha nga kining ilang pagsang-at karon ikatulo pa ug dili ika-upat nga termino tungod kay naputol ang ilang ikatulo nga termino tungod sa ilang pagkasuspenso.

Si Andales nasayod nga ang pagkasuspenso dili maisip nga “interruption” sa usa ka termino kay usa man siya ka abogado. Nagtuo ko nga namasin lang silang duha nga mopabor nila ang balaod.

Apan konsensiya nalang unta ang ilang gamiton aron mohukom nga ihatag lang sa uban ang oportunidad paghupot og gahum isip konsehal sa dakbayan.