Usa sa mga higpit nga karibal sa politika sa pamilyang Garcia sa Lungsod sa Dumanjug ang niawhag sa Commission on Elections nga kanselahon ang certificate of candidacy ni Kongresista Gwendolyn Garcia isip kandidato pagka-gobernador sa Sugbo alang sa 2019 elections.
Si Atty. Edgar Gica, amahan ni Dumanjug Mayor Efren Guntrano Gica nga gitaktak sab sa Ombudsman kaniadto tungod sa mga kasong dishonesty ug grave misconduct, maoy niawhag sa Comelec.
Matud ni Gica nga wa motug-an si Garcia sa tinuod diha sa iyang COC nga gisilutan siya sa Ombudsman og pagkataktak sa serbisyo ingon man gidid-an nga makahupot og bisan unsang posisyon sa gobiyerno. Ang desisyon sa Ombudsman giapelar ni Garcia ug anaa pa sa Court of Appeals sa pagkakaron.
Apan sigun ni Garcia nga wala pay penal nga hukom ang korte sa iyang kaso busa ubos sa lagda nagpabilin pa siyang inosente sa pasangil ug way babag alang sa iyang pagpapili pag-usab isip gobernador sa Sugbo.
Ug segurado ko nga si Gica nakasabot kaayo kanus-a maisip nga penal ang desisyon sa usa ka kaso. Isip usa ka manlalaban nasayud si Gica nga ang hukom sa Ombudsman nga nagpahamtang ni Garcia sa silot pagkataktak sa serbisyo ug ingon man pagdili nga makahupot og pwesto sa gobiyerno bisan kanus-a mamahimo pa nga mausab.
Wala ni kalainan sa kaso sa iyang anak nga mayor sa Dumanjug diin siya maoy abogado. Ang iyang anak gitangtang sab sa Ombudsman pagka-mayor ug gidid-an nga makahupot og bisan unsang pwesto sa gobiyerno.
Apan ilang giapelar ang kaso didto sa Court of Appeals ug gibaliktad sa korte ang desisyon sa Ombudsman. Sa ato pa hangtud nga dunay desisyon ang CA sa kaso ni Garcia posible pa gihapon siyang maabswelto. Bisan gani og mapilde si Garcia sa iyang appeal duna pa gihapon siyay higayon nga dad-on ang kaso sa Korte Suprema alang sa penal nga hukom.
Dili unique ang kaso ni Garcia, daghan na ang ingon niini nga mga kaso apan gitugotan sa Comelec ang kandidatura. Pananglitan si Kongresista Rodrigo Abellanosa sa Cebu City South District nga gitaktak sab kaniadto sa Ombudsman ug gidid-an nga makahupot og pwesto sa gobiyerno. Nidaug si Abellanosa sa eleksiyon ug gibaliktad sa CA ang hukom sa Ombudsman.