Dili na maayong ablihan ang peace talks

Kataw-anan. Si Jose Ma. Sison, ang founding chairman sa Communist Party of the Philippines (CPP),  daw nagpaklta nga mas labaw pa siya kagamhanan ni Presidente Rodrigo Roa Duterte diha sa iyang pag-ingon:

“NDF is always open to resume peace negotiations with the government. We can negotiate...It is up to Duterte to decide whether he is interested to peace negotiations. Duterte terminated the negotiations. If peace talks will not resume under Duterte’s regime, the CPP-NPA-NDF would wait for the next administration.”

Nanindog akong balhibo niining gihimong Sison. Dili kay si Duterte ray indirekta niyang gimandaran nga ablihag usab ang peace talks nga taudtaud nang gisiradohan. Kun dili, ang Republika sa Pilipinas mismo, or kitang tanang Pinoy, kinsa nagmahal sa atong yutang natawhan, maoy gimanduan niining rebeldeng lider, kinsa dili kalinaw ang gilantaw kun dili pirmeng pagsurangsurang. Imbis ang peace negotiations  maghatag og kasulbaran,  nagmugna na hinuog dugang kasamok tungod sa kagahig ulo sa iyang mga armadong sumusunod, kinsa  walay tahud sa gikauyonang ceasefire samtang ang panagsabotsabot tali sa kadagkoan sa rebelde ug gobiyerno nagpadayon.

Pipila na ba ka kinabuhi sa mga sundalo sa Pilipinas, ang nangamatay nga walay armas human gi-ambush sa walay kaluoy’ng grupo sa NPA panahon sa peace talks?  Pipila na ba ka nangaging Presidente ang nakig-peace talks sa leaders sa mga rebelde ug nganong hangtud karon nagpabilin man ang kabangis sa kagubot nga niulang sa CPP-NPA-NDF ug atong gobiyerno?  Kini nagpasabot lang, nga ang peace talks with personal greed conditions  are useless. Unya karon, gikuhit-sugo na pud ni Joma si Duterte nga pabuksan kinig balik? Alang sa unsa pa? To experience more casualties and betrayals?

Nalimot ang mga rebeldeng grupo nga ang mga military nga ilang gibanhigan-patay, sama ra pud nila, mga Pinoy ra usab?  Nganong mag-unay man og pinatyanay nga may mas nindot mang paagi nga magkasabot ang tanan, diin walay kinabuhi nga maalaot?

Sukad pa niadtong campaign period sa natioanl elections,  giawhag ni Tatay Digong ang tanang rebelde nga mobalik na sa sabakan sa balaud kay bukas ang iyang kasingkasing nga modawat ug motabang nila og hatag og igong kapanginabuhian. Di ba, mas nindot? Ato ning sulayan, Bay!