Walay kapilian

Dul-an usa ka semana na nga wala ko mogamit sa akong sakyanan og ga commute ra ko kada adlaw padung sa trabahoan ug pauli sa balay.

Gikinahanglan pa nga ayuhon ang akong service vehicle kay nagmanya naman sad pastilan.

Bitaw, nakaingon naman lang sad ko nga mas ok pa nga mag commute nalang ko kay makalikay sa hilabihan ka mahal sa presyo sa gasolina nga kada semana mosaka.

Makalikay sad sa kahasol sa grabeng trapik karon sa Metro Cebu nga modul-an sa duha ka oras ang akong biyahe gikan sa Cebu City pauli sa Lapu-Lapu City.

Ilimugmog lang lagi ang gasolina sa akong awto nga mogasto ko halos singko ngadto sa 6 mil pesos ang bulan sa gasolina.

Akong na realize nga mas makapahulay kon magsakay nalang og V-Hire tungod kay makapahulay pa taliwala sa grabeng traffic kay dili naman ka mag drive.

Apan ang nakaparat karon kay hilabihan man pud ka taas sa linya sa mga pasahero sa V-HIRE nga gikiahanglan nga molinya pud ka og tungha sa oras ayha makasakay.

Ang ubang V-hire dili man mobiyahe kon rush hour kay maglikay sa traffic, maong manakit gyud ang tuhod sa pagbinarug sa mga pasahero.  Samot pud sa mga PUJ kay gailogay sa pag sakay ang mga pasahero.

Lahi ra gyud kaayo sa unang panahon nga dili man hasol kon mag public ride ka apan karon labaw pa sa hasol ang bation sa mga pasahero.

Mao ni nga dili ko kabasol sa uban nga magamit og kaugalingong sakyanan aron dili mahasol ilabi na kon adunay mga dalanh anak.

Ang pag baton og kaugalingong sakyanan karong panahona dili kapritso kon dili gikinahanglan na gyud.

Hinoon gawas sa PUJ, anaa may mga habal habal kon magdali gyud ka nga mao say akong usahay madali dali inig pauli aron dili matanggong sa traffic apan medyo delikado.

Sa sitwasyon karon sa Metro Cebu wala gyud kitay kapilian, seguro ang atong mahimo mao ang pag anad anad lang sa kalbaryo sa traffic.