Aron makatulog dayon nga presko inig bangon (1)

Ang tawo nagkinahanglan nga makabaton og maayong kalidad sa pagtulog nga walo ka oras. Apan kadaghanan maglisud sa paghimo niini. Ilabi  na niadtong nanimuyo sa dakbayan, imbes gikapoy nga makatulog unta apan ang hunahuna, padayon nagduhiraw sa kagabhion, nga igka-buntag morag manok nga gidungoy.

Sagad sa maong sitwasyon, mag-alindasay nga kanunay mobangon nga mangabli sa ref kay ang tiyan niduyog sa gibati niini nga kahaw-ang.  Nabibawo ba kita, kon unsay remedyo ini, aron gyud kita makatulog dayon ug nga ini’g mata sa buntag, presko pa nga kondisyon kaayo ang pamati sa atong lawas ?

Tungod kay kon wa kitay maayong kinatulgan sud sa 4-5 ka adlaw, kalagmitan dinhi magsugod nga saw-on kita sa sakit nga insomnia. Ug ang epekto ini, dili na usab kita epektibo sa inadlaw nato nga kaakohan. Kay mabalda sa kaluyahon nga makasipok sa utok, nga gikutas ang hunahuna sa grabeng kahasol ug kalaay.

Suwerte nga nakautingkay kita og simple nga resipe, nga nakapukos sa pag-alibyo, aron kita magmalinawon nga makatulog dayon. Aduna lang kini 3 tulo ka ingrediyentes, ania ato ni nga ipresentar kaninyo ang mga mosunod.

Mao ni ang preparasyon..*  usa ka kutsara sa lana sa lubi (cold compressed extra irgin coco oil)…* ¼ ka kutsarita nga puro dugos ( pure honey ).. ug * 1/8 ka kutsarita nga asin (sea salt o rock salt).

Kining makapahingangha nga kombinasyon, motabang sa lawas aron kita makatulog dayon nga wagtangon ang naka-trigger sa stress ug nga dili makatugaw ang unsa man nga kasikas.  Kay kontrolahon niini ang produksyon sa ‘stress hormones, sama sa ‘adrenalin ug cortisol’ nga mao ang nakaingon sa problema nga nakadisturbo sa kalidad sa atong pagtulog.