Ginadili ang pagpatay

Supak sa kabubut-on sa Diyos ang pagpatay. Mao kini hinungdan nga bokal kaayo ang Simbahang Katoliko niini. Kay klaro sa sugo sa Diyos nga gidili ang pagkutlo sa kinabuhi sa tawo.

Isip usa ka Katoliko, gitahod ko kining maong kasugoan sa Ginoo.

Apan sama sa uban, gisuportahan nako ang kampanya batok drugas ni Pres. Rodrigo Duterte.

Maayo na kaayo nga naka-presidente kita nga may dugong Sugboanon nga seryosong mituman sa iyang saad atol sa kampanya sa 2016 presidential elections nga iyang pulpogon ang ginadiling drugas.

Daghan ang nalipay sa gihimo sa presidente. Makita kini sa mga survey nga nagpabilin ang iyang trust rating.

Apan dili tanan ang nalipay kay aduna man gyuy naguol niining maong kampanya.

Usa na niini ang mga tawo nga nagnegosyo og drugas, kadtong nanga-adunahan tungod sa drugas, ug kadtong mga nabulahan sa negosyo sa drugas sama sa mga politiko nga nagdawatan og narco-money ug kadtong mga propesyonal nga napiksan sa kuwarta gikan sa mga drug lord (abogado, doktor, ug uban pa).

Ang labing dautan nga wala malipay ang mga narco-politicians, sama sa mga mayor nga nabulahan ilang politika sa tabang sa mga drug lord.

Busa kon adunay mga balita nga adunay gipatay ug ang nangatumba adunay kalambigitan sa negosyo sa drugas, dili malikayan nga maglungotlungot ang narco-politicians ug kadtong mga tawo nga nabulahan sa negosyo.

Kon mahanugon kita sa kinabuhi sa tawo, atong suportahan ang kampanya sa drugas tungod kay kining drugas ang tinubdan sa ubang krimen sama sa rape, robbery, murder ug uban pa.

Sama sa nahitabo kang PO3 Alcestes Roxas nga sakop sa Aviation Security Unit-7 sa Mactan Cebu International Airport nga gipatay og usa ka gipasanginlang adik human kini gibadlong sa maong polis nga moundang paggamit og ginadiling drugas.

Tiaw mo na, polis na ang gipatay sa adik nga gibadlong sa iyang pagka-adik!

Kon mahanugon kita sa kinabuhi sa mga adik ug mga drug lord, kining maong klase sa mga tawo ang dili mahanugon sa kinabuhi sa mga inosente.

Apil unta sa atong ikampanya ang kinabuhi sa mga inosente nga posibleng madaot o makutlo diha sa mga kamot sa mga adik o drug lord.

Aduna kitay balaod, tinuod na! Apan nasayod kita sa dihang wala ma-presidente si Duterte, ang balaod gipamaligya sa mga abogado, piskal o huwes nga ang mga adik, pusher o drug lord, dali ra’ng makagawas sa prisohan pinaagi sa kuwarta.

Ang mga drug lord lisod sipongon kay walay bitbit nga drugas busa walay makuhang ebidensiya kun madakpan.  Mao nang nanaghan sila.

Sama nianang ilawom sa Mananga Bridge nga anaa tanang klaseng kriminal. Manghinaot ko nga sudlayon sa kapolisan ang lugar aron tisdon ang mga kriminal (adik, kawatan, murderer) nga anaa maglublob ilawom sa Mananga Bridge.