Ang speech sa presidente

Naukay ang mga tawo sa pamahayag ni Pres. Rodrigo Duterte niadtong Septiyembre 27 atubangan sa mga government executives human gipakadako sa national media ang ilang giingon nga pag-angkon kuno sa presidente sa extra-judicial killing sa nasud.

Kon basehan nimo ang mga post sa Facebook, makatuo ka nga miangkon ang presidente sa EJK sa nasud. Apan kon imong basahon ang tibuok speech sa presidente, makita nimo ang “art of splicing” kon pagputolputol sa pamulong sa presidente.

Busa kadtong nakabasa sa Facebook, sulayi ninyo og basa ang speech sa presidente aron mahibaw-an ninyo kon miangkon ba gyud siya o wala.

Apan para nako, ang gipasabot sa presidente mao nga bisan kanus-a wala gyud siya malambigit sa kurapsiyon bisan piso ug wala gyud siya malambigit og politikanhong pagpanimalos. Ug gisumpayan lang niya ang gipasangil lang nila kaniya mao ang EJK.

Dili katuohan nga angkonon sa presidente ang sunodsunod nga patay sa nasud nga natayming nga gipatuman niya ang pakiggubat batok drugas.

Si Duterte nga dugay nahimong prosecutor o piskal moangkon sa salaod? Dili katuhoan.  Duha ang akong tan-aw niining bag-ong isyu sa gipamulong sa presidente.

Una, ang presidente hilig mangomedya ug magpakatawa sa mga tawo nga naminaw sa iyang pamulong. Busa, lisod pag-ila hain sa iyang pamulong ang seryoso ug hain ang binuang.

Ikaduha, Bisaya nga dako si Duterte. Kahibalo naman kita nga kon siya na gani ang mo-estorya, putol-putol, hunonghunong, saksak-sinagol, ug halohalo ang iyang mga pulong.

Dinhi naglisod ang mga media sa Manila. Mao nang usahay maglibog kita kon unsay gipasabot sa presidente. Usahay maklaro usab nga ang media sa Manila nangita lang og sayop sa mga pulong nga gibuhian sa mga baba sa presidente.

Natong mga Bisaya, hilig kita mo-estorya og binali o dinoble.

Moingon ka nga “kaon na habhab pa gyud,” “pakan-on pa, mangayo pa’g bring house,” “patrabahoon ka mangayo pa gyud ka’g suweldo.”

Gipakadako kini sa oposisyon. Nakakita sila og oportunidad nga ilang ma-atake ang presidente sa giingong EJK.

Apan wala sila masayod nga ang mga Pilipino mipakpak sa presidente tungod sa iyang paggukod sa drugas, ang kanser sa nasud nga nakaapekto sa mga Pilipino.

Madungog nato ang inestoryahan sa presidente. Problemado gyud kaayo kini. Apan unsaon ta man og mao na gyud na ang inestoryahan sa presidente?

Apan naa bitaw kitay mga presidente nga desente tuod kaayo, apan diin man dad-a atong nasud?

Problema kaayo ang inestoryahan ni Duterte. Apan siya lang ang presidente nga nakalimpyo sa drugas sa nasud.

Nangreklamo lang ang mga apektado sa maong ilegal nga negosyo.