EDITORYAL - Hustisya alang sa mga uyamot

Ang inhustisya sa mga biktima sa pagpangabusong binuhatan sa estado lawom na kaayo og dulot ug nagbilin og uwat sa kasingkasing sa mga gilupig.

Pila pa kaha ka mga biktima sa politika, pagpangabuso sa mga naa sa gahom ug kadtong mga inosenteng gibutangbutangan lang ang padayong nagpakahilom tungod kay nawad-an na og pagsalig sa sistema sa hustisya dinhi sa nasud.

Ang sistema nga mao untay gisaligan ug kadangpan mao man hinuoy gigamit sa mga abusadong naa sa posisyon aron duwa-duwaan ang katawhan.

Pan-os ug bugnaw man kini , tam-is gihapon kini alang sa mga uyamot nga gihikawan. Maayong ang mga berdugo dili na makatisngi sa pag-antos sa mga biktima.

Magsilbi untang leksyon sa mga kasamtangang anaa karon sa posisyon ug sa padayong nangyatak sa katungod sa uban kining pagkombikto sa human rights violator nga si kanhi Major General Jovito “The Butcher” Palparan ug duha niya ka mga kaubang kanhi sundalo.

Si Palparan kinsa hangtud sa kataposan pagbasa sa hukom sa hukmanan sa Malolos pabiling nagmagahi ug nakaako pa pagbalikas sa huwes.

Siya ug silang Lt. Col. Felipe Anotado ug S/Sgt. Edgardo Osorio  nahukmang mabilanggo sa tibuok kinabuhi tungod sa pagkahanaw sa duha ka mga aktibistang babayeng tinun-an sa UP nga silang Sherlyn Cadapan ug Karen Empeño.

Ang duha gidagit sa Barangay San Miguel, Hagonoy, Bulacan niadtong Hunyo 26, 2006 ug hangtud karon wala pa igkita ug gituohang patay na.

Tinuod sa kataposan naabtan ra gyud sa mga kamot sa hustisya ang mga nanamastamas sa mga biktima.

Apan pila pa kaha ka libong kinabuhi ang utang sa estado nga hangtud karon wala pa mahatagi og hustisya? Kanus-a sab kaha nila matagamtaman ang hustisya?

Pasidaan kini ngadto sa mga sakop sa militar ug kapolisan ug uban pang mga state actors nga karon nagtago sa ilang gahom, kay dili magdugay mataral gihapon sila sa hukmanan ug pagabayran dili lang nila kondili hasta sa ilang pamilya ang ilang kadaotan.