Tinud-on kaha ni Mayor Tomas Osmeña iyang bahad nga demolison ang Land Transportation Office (LTO-7) tungod sa iyang dili maayong relasyon tali sa direktor sa ahensiya nga si Victor Caindec?
Maayong magbantaybantay na ang mayor sa iyang linihokan karon nga mismo si Pres. Rodrigo Duterte nagbantay na kaniya.
Human na siya bahari nga tamparoson ni Duterte tungod sa iyang pagpakig-away sa mga polis sa rehiyon ug sa siyudad pinaagi sa paghingalan nila nga mga “hitman” ug midako sa dihang iyang gibuhian ang tulo ka dinakpan sa Parian Police Station nga namaligya og butane.
Gipasangil sa mayor nga iyang demolison ang LTO-7 sa luna nga iya sa siyudad tungod sa matud pa paggukod sa maong ahensya sa mga motorista nga walay rehistro ug walay plate number ilang mga motor.
Kon tinuod kini, nawala na gyud sa maayong panghunahuna ang mayor. Mandato sa LTO ang pagseguro sa safety sa mga motorista.
Apan taym pa ra gud, kinsa man ang nanggukod sa mga motorista? Pila na ka motorsiklo ug mga pribadong sakyanan ang gi-impound sa Cebu City Traffic Office (CCTO) tungod sa Executive Order sa mayor kontra counter-flowing?
Nganong pasanginlan man ang LTO nga kaniadto pa man sa panahon sa tawo ni Tomas nga si Arnel Tancinco nagsige og panakop?
Akong klarohon, dili ko supak sa polisiya kontra counter-flowing. Apan nganong mo-counterflow man ang mga motor? Kay puwerte nang trapika sa siyudad. Nga matud sa mga motorista kon mosunod sila sa flow sa trapiko, mahaponan sila sa karsada.
Maayo pay gipa-synchronize sa mayor ang mga traffic lights nga 1980s pa nagsiga ug hawanan ang mga encroachment ug magpalapad og mga karsada aron mawala ang trapik, wala nay mo-counterflow.
Giingon sa mayor nga himuon niya ang extension sa Cebu City Medical Center (CCMC) sa luna sa LTO-7. Kon wala pa unta niya kontrahi ug gilangaylangay ang bag-ong CCMC building nga gipatukod ni Mike Rama, wala unta kini problema.
Kon iyang tinud-on, dili ba kaha moanha na gyud sa City Hall si Duterte aron tamparoson siya?
* * *
Nagtuo ko nga kining pagkapalaaway sa mayor may kalambigitan kini sa sigeng pangaway ni Senador Antonio Trillanes IV kang Duterte.
Tiaw mo nang pagtibugsok sa peso kontra dolyar, pagmahal sa bugas, ug inflation (pagmahal sa palaliton) ibasol ni Trillanes kang Duterte bisan nakahibalo kining daghan ang “factors” nganong nanghitabo kini sama sa trade war sa Amerika ug ubang nasud, krisis sa currency, ug ang TRAIN Law nga mo-finance sa bag-ong programa sa nasud.
Silang Osmeña ug Trillanes na lang ang nahibiling sabaan sa oposisyon. Silang Kiko Pangilinan, Frank Drilon, Leni Robredo, ug uban pa, hilom na kay hadlok magukdan.
Wala ra ba kapresentar sa korte sa kopya sa amnesty. Kuyaw ni si Trillanes og maisyuhan og warrant. Kinsa pud kahay sunod?