Nakalabay na ang mabangis nga bagyong Ompong ug salamat nga wala kini nakamugna og dakong kadaut ilabi na sa kinabuhi sa katawhan.
Hinoon dili ikapangutana ang kadako sa danyos nga namugna niini sa agrikultura ug imprastraktura ilabi na sa mga dapit didto sa Northern Luzon nga direktang naigo ni Ompong.
Duna usay nangadaut sa Kabisay-an ug Mindanao apan murag dili ingon ka grabe itandi sa Luzon.
Dinhi sa Sugbo nakasinati kita og hangin apan dili man kaayo kusog, wala usay ulan, kung naa man apan hinay ug dali ra mituwak.
Sa pag-igo sa bagyong Ompong, makaingon kita nga mosaler gyud diay ang subsob nga pagpangandam sa paglikay sa grabeng kadaut sa ingon niini ka kusog nga katalagman.
Siguro nakakat- on na og leksyon sa kasinatian sa bagyong Yolanda diin hilabihan ka daghang kinabuhi ang nakalas.
Ang uban nga hinawayon mihulagway nga nasobrahan o overacting ra ang ubang local government units sa pagpangandam nga layo ra man kuno ang bagyo. Anaa ganiy mikwestyon ngano kuno nga wala man lagi kita makasinati diri sa Sugbo og grabeng ulan ug kusog nga hangin?
Kining ingon niini nga tawo maayong itukmod sa mata sa bagyo aron makita niya ang iyang gipangita. Bahala na og masobrahan ang pagpangandam basta masiguro ang kaluwasan sa katawhan.
Wala say kumo sa hugot nga pag-ampo tungod kay ang gibansagan nga super typhoon Ompong wala kapiog sa gahum sa Ginoo.
Salamat Senyor Sto. Niño sa proteksyon nga gihatag nimo panahon sa bagyong Ompong!