Lawom nga rason sa kasuko ni DU30

Lawom-lawom ang rason nganong gideklarar sa Malacañang nga “void ab initio” ang amnesty ni Senador Antonio Trillanes IV.

Sa mga personalidad sa oposisyon, si Trillanes na lang ang nahibilin nga grabeng kasabaan ug grabe mosabwag og bakak nga propaganda batok sa administrasyon.

Wala na makaagwanta si Pres. Duterte sa mga walay hinungdan nga panaway ni Trillanes kaniya ug sa iyang pamilya. Ug kay napangitaan og buslot iyang amnesty, kuyaw siyang mag-atubang og aresto ug matanggong, sama sa laing sabaan nga napapriso gyud tungod sa kasong pagpakigkunsabo sa mga sindikato sa drugas.

Si Bise Presidente Leni Robredo nga maoy giisip nga lider sa oposisyon, silang mga Senador Franklin Drilon, Kiko Pangilinan ug Risa Hontiveros dili na man kaayo mo-atake sa presidente. Kon mobuka sila sa ilang mga baba, isyu ra man gyuy ila.

Nagtuo ko nga pangandam sa 2019 nga eleksiyon kining pagpadakop kang Trillanes. Kay kon pasagdan si Trillanes, kuyaw kining mobuka sa iyang baba kay hasta mga bakak ug “unverifiable” nga mga butang iyang ipasangil.

Dako man tinuod nga sagpa sa demokrasya kon gukdon ang kritiko sa administrasyon. Apan lahi kining kaso ni Trillanes kay duot sa bukog iyang kalagot nganong nakadaog si Duterte.

Hasta gani amahan ni Duterte dugay rang namatay gipasanginlan niyang mimaniobra sa iyang Bar exam, unya ang mga paryente ni Special Assistant to the President Bong Go giduhig usab sa isyu sa mga proyekto sa Davao.

Sa dihang gihisgotan ni Duterte iyang tigulang nga inahan, si Trillanes mikisikisi kay nganong iapil iyang mama.

Hanggaw!

* * *

Ang siyudad sa Sugbo ug ang probinsiya sa Sugbo mao na lang karon ang giisip nga “last bastion” sa Liberal Party. Si Mayor Tomas Osmeña, iyang pamilya, ug si Gobernador Junjun Davide na lang ang nahibilin nga political family nga loyal sa Liberal Party.

Mao usab tingale kini ang hinungdan nga sama kang Trillanes, gisugdan na og bira ni Duterte si Tomas pinaagi niadtong iyang speech sa Charter day sa Mandaue City diin miingon siyang iyang “tamparoson” si Tomas.

Emosyonal kaayong mimando si Pres. Duterte kang PRO-7 Debold Sinas nga pasakaan gyud og kaso si Tomas kay gusto siyang makakita nga magtingkagol kini sa prisohan. Unya giingnan pa si Sinas nga kon magbinuang pa gani nila, ipaingon siya kay iyang “itamparos ang tae sa iyang kilid” diha sa iyang nawong.

Nganong ingon ana na man kapungot si Duterte ngadtong Tomas, sama sa iyang kapungot kang Trillanes?

Ang presidente, tingale, nasayod nga si Tomas loyal gyud kaayo sa Liberal Party ug nga ang girombo niini mao ang “war on drugs” sa presidente pinaagi sa pag-away sa mga polis.