Kangitngit gikan sa “tamparos”

Nagkangitngit na ang kaugmaon sa mga Osmeña sa politika human sa speech ni Presidente Rody Duterte niadtong duha ka semana ang nakalabay atol sa Charter Day sa Mandaue City diin ang presidente miingon nga iyang “tamparoson” si Mayor Tomas Osmeña.

Puwerte gyung sukoa ni Duterte kang Osmeña kay sa dihang paingon na unta kining mosakay sa eroplano, iya pa gyung gibalikan si PRO-7 Director Debold Sinas nga nagtindog, ug giingnan sa presidente: “Do it! File it! Gusto ko makakita niyang (Tomas) nga magtingkagol. Ingna ko’g magbinuang pa na ninyo. Kay kanang tae sa iyang kilid ako nang itamparos sa iyang nawong.”

Ang nasuk-an sa presidente mao ang pagpunay og pangaway ni Tomas sa mga polis. Nagsugod kini sa dihang si Tomas milaban kang kanhi kapitan Jessielou Cadungog sa Tejero.

Ang bodyguard ni Cadungog nga si William Macaslang gipasanginlang maoy mipusil-patay kang PO3 Eugene Calumba nga gituhoan nila nga hitman. Si Cebu City Police Office Director Royina Garma miingon nga si PO3 Calumba igo ra nga nag-surveillance sa Tejero.

Ang giingon sa presidente nga “do it, file it” nagpasabot kini sa kaso nga gisang-at sa CCPO batok ni Tomas human kini mibuhi sa tulo ka dinakpan sa Pari-an Police Station kay namaligya og butane sa T. Padilla public market.

Ang estratehiya ni Tomas karon nga nasayod na ang mga tawo nga tamparosonon siya ni Duterte tungod sa iyang panghawod mao ang pagpaluoy-luoy daw underdog. Apan para sa uban, dili na magsilbi kining luoy-luoy ug underdog kay bisan unsaon minaldito man ang barog sa mayor.

Gani, namatid kini og barbecue vendor, mibunot sa iyang armas atol sa piket sa Gaisano, nangliab og sheriff nga igo rang nagtuman sa trabaho, nangamatay nalang ang mga tawong mitabang niya pag-uli niya gikan sa Amerika, wala gyud niya tagda (sama nilang Abellana, Gabby Leyson, ug daghan pa).

Laing strahehiya karon ni Tomas ang pagduol sa mga suod ni Duterte aron magpa-abogar sa tuyo nga paminawon usab siya ni Duterte.

Usa sa giduol ni Tomas uban sa iyang asawa nga si Konsehal Margot Osmeña (naay nag-ingon nga kuyog usab si Miguel) mao si kanhi presidente karon Speaker Gloria Arroyo.

Demalas kay gitubag silang Arroyo nga dili siya mag-apil-apil sa lokal nga politika. Apan sumala sa suod ni Arroyo nga kongresista nga didto sa opisina sa Batasan Pambansa miingon nga si Arroyo dili ganahan motabang sa mga Osmeña kay sa wala pa ang 2010 nga eleksiyon, si Tomas ug ang Bando Osmeña Pundok Kauswagan (BOPK) maoy nag-una-una og abandonar ni Gloria sa dihang gisugdan siya og panit-panit sa Liberal Party pinaagi sa mga kaso. Kon tinuod kini, pagka-wala gyud diay batasan.

Nakadawat ko og report nga naghunahuna karon og layat ang mga kapitan nga nakadaog niadtong miaging barangay elections gikan sa kampo sa mayor.

Nakatimaho na tingali nga ang away ni Tomas sa mga polis away tali niya ug kang Duterte.