Kinaadman

Ang sagad nga tan-awon sa mga tawo aron makahatag siya sa iyang pagtamod sa tawo nga iyang ikaatubang mao ang edukasyon  nga naabot sa maong tawo. Usahay ang mga tawo nga taas og kaalam puno sa garbo ug dili na gani hapit mamati sa mga tawong ubos og kahibalo kay lagi menos man og grado.

Pasulabi ang iyang garbo nga mao na hinuon makahimo niyang kataw-anan ug mapuno siya sa pagsaway. Kay bisan siya’y sayop dili modawat kay lagi ang nagsulti ubosan og grado.

Sa kinabuhi dili ang kataas sa kinaadman ang sukaranan sa pagkatawo kondili ang iyang abilidad sa pagtimon sa iyang kinabuhi sa pagkab-ot sa iyang tingusbawan, kakugi, pailob ug hugot nga pagsalig sa Ginoo ug sa kaugalingon. Kay ang lumba sa kinabuhi wala magsukad sa pagka-degree holder kung dili sa paglahutay sa aron ikaw ang modaug.