Sa makausa pa, napamatud-an na sab nga sayop ang economic managers ni Presidente Rodrigo Duterte. Human nipasalig nga magsugod na og tidlom ang presyo sa nag-unang mga palaliton sa niaging buwan, gibutyag sa Philippine Statistics Authority (PSA) nga niburot ang inflation rate sa Agosto ngadto sa 6.4%, ang kinatas-an sa niaging siyam ka tuig.
Di ni unang higayon, ug nahadlok kong di maoy kataposan, nga sayop sila. Angay nga pahinumdoman ang mga sinaligan sa presidente nga silang Finance Secretary Sonny Dominguez ug kaubanan nga mga ekonomista sila, di mga propagandista.
* * *
Nagkataas nang listahan sa mga sayop sa economic managers nga gihatagan ni Presidente Duterte sa hingpit nga kagawasan pagduma sa ekonomiya samtang nitingob sa tanan niyang panahon sa drugas:
• Nipasalig sila nga gamay rang epekto sa Tax Reform for Acceleration and Inclusion (TRAIN) Law, mosaka lang ang inflation rate og 2% ngadto sa 4%;
• Nipasalig sab silang mobarato og hangtod P7 matag kilo ang presyo sa commercial rice kon moabot nang importasyon sa bugas humay sa National Food Authority (NFA); ug
• Nipasalig sila nga di mosaka ang presyo sa nag-unang mga palaliton.
* * *
Niangkon si Gobernador Nestor Espenilla sa Bangko Sentral ng Pilipinas (BSP) nga ang nagpadayon pagsaka nga presyo sa bugas humay ug ubang pagkaon nakatampo og dako sa pagburot sa inflation rate.
Gisukwahi niya ang pasangil ni Presidente Duterte nga pamolitika ra ang mga pasangil sa kamahal sa bugas humay ug ang pag-insistir ni Trade Secretary Ramon Lopez nga wa mosaka ang presyo sa kasagaran sa inadlaw nga mga panginahanglan, apil na sa pagkaon.
* * *
May bag-ong pasalig si Budget Secretary Benjamin Diokno, laing sinaligan sa presidente: Mohiyos nang inflation rate dayong tapos karong tuiga ug mahibalik na ang naandan nga presyo sa mga palaliton sa sunod tuig.
Duna sab siyay bag-ong gitulisok sa padayong pagsaka sa presyo sa mga palaliton: Mga negosyante nga nagpahimus sa sitwasyon pinaagi sa pagpaburot sa ilang ginansiya. Utangan pa ra ba ni si Diokno sa katawhan.
Kay hangtod karon wa pa gyud siya mangayo og pasaylo sa nahauna nga binuang niyang tulisok nga ang mga tapolan ra ang nagsige og tiyabaw sa mas apiki nilang kahimtang.
* * *