Kalit lang nga nagulhos-ulhos pangabot dinhi sa Sugbo ug nagpakita sa publiko kaning mga personalidad nga kaniadto dili gani molingi ni mohisgot bahin sa Sugbo. Kini tungod kay hapit na man ang eleksyon.
Sila kadtong mga tawong bisan wala moangkon sa ilang tuyo dinhi klaro na nga nangambisyon sila og nasudnong posisyon.
“Oplan Pakilala” ang tawag niini sa sirkulo sa media, matag adunay mga bag-ong hepe nga madestino, mangugi dayon sa trabaho aron mailhan di lang sa publiko kondili hasta sa mga ilegalista.
Kaning mga indibidwala dali usab kaayong mosakay sa mga init nga isyu nga gisaw-an sa katawhan aron kunohay may tumong ang ilang pagpakita dinhi.
Ang uban nila mga incumbent officials na sa ilang tagsa-tagsa ka mga probinsya ug ang uban mga “kuyog-baboy” nga nangambisyon pud sa umaabot nga eleksyon.
Ilaha kining pamaagi aron sila mahinumdoman sa mga botante panahon sa eleksyon. Dunay uban dili lisod ipaila kay baniog na ang pangalan samtang duna say uban nga mao pay pagsugod pagladlad sa publiko.
Bentaha kadtong mga ilado na kay hangpon man sila sa mga tawo bisan pa og negatibo pa ang pagkahinumdom kanila sa tawo kay panagsa ra silang makakita sa personal.
Wala hinuon silay dautang gihimo o balaod nga nalapas. May kagawasan sila paghimo sa ilang gusto kon maoy ilang tumong nga mailhan sila sa mga tawo.
Apan kataw-anan kay nakahibalo sila nga ilang giilad ang mga tawo kay “obvious” baya ilang tumong bisan og nagpagoryo-goryo lang sila dinhi.
Kataw-anan sab ang mga tawo kay kabalo baya sila nga giilad lamang sila aning mga tawhana apan nisakay-sakay lang pud.
Mao kini ang klase sa electorate dinhi sa ato, kabawo nang giilad ra sila magpailad gihapon sa mangingilad.
Labaw sa tanan ang mga Pilipino daling makalimot ug di makat-on sa nangaging mga leksyon ug motuo dayon kon unsay bag-o.