Dako kaayo ang problema sa Pilipinas sa suplay sa bugas. Nameligro ang nasud sa pagnihit niini nga maoy nag-unang pagkaon sa mga Pilipino.
Daghang mga nanggawas nga mga balita bahin niini ug sa kon unsay gihimo sa gobiyerno aron mapuno og balik ang mga bodega sa National Food Authority nga karon nangabasiyo na tungod sa kanihit sa gi-import nga bugas.
Ang kaniadto abundang Pilipinas kon bugas maoy hisgotan napugos na lang pagsalig sa bugas gikan sa ubang mga nasud aron lang mapakaon ang mga kabus nga mga Pilipinong di makakaya pagpalit og commercial rice. Daw na-hostage karon ang Pilipinas tungod niini.
Adunay mga restriksyon pag-import sa bugas sa pipila ka hingtungdang ahensya sa gobiyerno. Dugangan pa nga adunay mga gamhanang mga rice smugglers nga nakadugang sa pagburot sa presyo sa bugas karon.
May mga sugyot pa nga aron masiguro ang gidaghanon sa supply sa bugas sa nasud, mas maayo pang himuong legal nga operasyon sa mga rice smugglers. Kadako ba aning binuang.
Ilegal himuong legal? Wa nay laing nahunahunaang maayong solusyon kondili kini lang. Dili ba mao kini ang hinungdan kon nganong naipit karon ang katawhang Pilipino?
Base sa mga nanggawas nga mga balita, daw gi-hostage ang gobiyerno aron kini mohatag sa gustong mahitabo sa mga rice smugglers.
Naay maayong pamaagi nga pwedeng buhaton sa gobiyerno aron masigurong kanunay puno sa reserbang bugas ang mga bodega niini.
Kini sama sa pagtangtang sa restriksyon sa gidaghanon sa i-import nga bugas sa gobiyerno; pagpatong og mas taas nga buhis sa mga pribadong rice importers agi og suporta sa local rice; pagtabang sa gobiyerno sa mga mag-uuma og bugas humay aron mapadak-an pa ilang produksyon.
Ug labaw sa tanan pagpahamtang og mas bug-at nga silot niadtong masakpang rice smugglers ug uban pang matang sa mga batakang pagkaon nga ipalusot nga di mamayad og hustong buhis.