Para nako, mas maayong walay temporary restraining order (TRO) nga magpahunong sa implimentasyon sa Kawit Island Project pinaagi sa joint venture agreement tali sa kagamhanan sa siyudad sa Sugbo ug sa United Hotels and Resorts Inc.
Si Regional Trial Court Branch 23 Judge Generosa Labra wala mo-isyu og TRO sa kasong gisang-at ni Amilo Lopez, konsehal sa Barangay Busay, pagpahunong sa signing. Matud sa huwes nga “moot and academic” na ang injunction kay wala namay aksyon nga angay hunongon kay samtang naka-pending ang kaso, nagdalidali man og pinirmahay si Mayor Tomas Osmeña alang sa siyudad sa Sugbo ug mga Gokongwei sa UHRI sa JVA alang sa proyekto.
Apan dili kini ipasabot nga “smooth” ug wala nay sami ang pagpatuman niini.
Gipasabot ni Bise Mayor Edgar Labella nga ang TRO usa lamang ka “ancillary remedy” nga tipik sa kaso nga ilang gisang-at aron mahunong ang proyekto tungod kay, matud sa iyang grupo nga Team Rama PDP-Laban, alkanse ang katawhang Sugboanon.
Para nako, kon ipugos og dayon sa kampo sa Bando Osmeña Pundok Kauswagan (BOPK) ang maong proyekto, adunay mga opisyal sa siyudad nga mag-atubang og kaso. Ang kuyaw niini kay hasta ang minor de edad nga SK federation president nga si Jessica Resch kuyaw og maapil sa kasong graft.
“Grossly disadvantageous” nga kontrata ang JVA tungod kay sa kadako sa luna diha sa Kawit Island, 10 porsiyento ra gyud ang mapunta sa siyudad sa Sugbo.
Unya pa gyud sa 2027 magsugod og hatag sa 10 porsiyento ang UHRI. Sa 19 ka tuig, walay ihatag sa siyudad.
* * *
Duha ka mga rally ang mahitabo sa Septiyembre 9. Kini, kon idayon ni Mayor Osmeña iyang bahad nga mag-organisar siya og rally batok sa kapolisan tungod sa mga sunod-sunod nga pagpamatay dinhi sa Sugbo.
Si Konsehal Raymund Garcia mipahibalo usab kagahapon nga ang oposisyon sa siyudad sa Sugbo mag-organisar usab og rally sa samang adlaw himuong ang rally ni Tomas.
Kinsa kaha ang mahimong bati sa mga mata sa mga tawo ning duha ka rally? Tan-awon nato.
* * *
Dakong tulobagon ni Mayor Tomas Osmeña ang pagbuhi sa tulo ka dinakpan nga namaligya og butane canister sa T. Padilla.
Nakuhaan og CCTV ang pagpabuhi sa mayor gikan sa Pari-an Police Station.
Ebidensiya kini nga gigamit sa kapolisan aron mapakusgan nila ang mga kaso nga ilang gisang-at batok sa mayor.
Si Police Regional Office-7 Director Debold Sinas miingon nga walay “personal” sa kaso batok ni Tomas.
Nagsugod ang ka-init ni Tomas sa mga polis sa dihang pakasuhan unta ang alyado sa mayor nga si Konsehal Jessielou Cadungog tungod sa pagpatay kang PO2 Eugene Calumba sa bodyguard ni Cadungog.