Pamugos ni Mike Rama

Usa ka maayong lakang ang pag-usab sa ngalan sa Mactan-Cebu International Airport ngadto sa Lapu-Lapu International Airport agi’g pasidungog kang Datu Lapu-Lapu ang labing unang tawo sa nasud nga nakapilde og langyaw’ng mangsakopay (invader).

Mismo ang mayor sa Dakbayan sa Lapu-Lapu nakakita og dakong impact kon ugaling matinuod nga hinganlan og Lapu-Lapu ang airport.

Nagsugod kini sa dihang ang National Historical Commission mihimo og survey sa mga lumolupyo sa siyudad sa Lapu-Lapu kon uyon ba silang nganlan og Lapu-Lapu ang airport nga anaa sa siyudad.

Kini proposal sa NHC migawas human gipirmahan ni Pres. Rodrigo Roa Duterte ang Akta Republika 11040 nga nagdeklarar sa Abril 27 nga “Lapu-Lapu Day” isip usa ka nationwide holiday pagpasidungog sa kaisog sa Sugboanong bayani pagpatay kang Ferdinand Magellan (Fernando de Magallanes) sa dihang sakopon na unta niini ang isla sa Mactan.

* * *

Dakong perwisyo sa grupo sa PDP-Laban sa siyudad sa Sugbo kon mamugos si kanhi mayor Mike Rama nga modagan pagka-mayor atbang sa mipildi niya sa miaging eleksiyon nga si Mayor Tomas Osmeña.

Hangtod karon, nagpabiling balabag sa iyang ngalan ang pagka-apil niya sa narco-list nga gihinganlan ni Duterte sukad niadtong 2016. Kinahanglan pang limpyohon ang ngalan ni Mike sa dili pa siya mogara-gara og sakbang kang Tomas.

Karon lang gani, dayag ug libre kaayong nakabugalbugal si Tomas kang Mike ug sa iyang grupo nga Team Suyop. Tan-awa ang Facebook account sa mayor, gibalikbalik gyud ni Tomas ang Team Suyop.

Daghang tigpaniid sa dagan sa politika sa siyudad nga nag-ingon nga kon dili magkahiusa si Mike ug si Bise Mayor Edgar Labella, hayan kataw-an lang silang Tomas sunod tuig (2019) nga eleksiyon. Segurado usab ko nga gamiton ni Tomas ang saway nga Team Suyop sa grupo ni Mike ug Labella.

Adunay mga estorya-estorya hinuon nga nagkanayon nga si Mike andam nga mo-bise mayor kang Labella. Adunay nag-ingon nga mag-kongresista lang usab si Mike aron mopilde kang Bebot Abellanosa.

* * *

Pero tinuod ba gyud kaha nga protector si Mike sa ilegal nga drugas sa siyudad? Dili ba kaha naunhan lang si Mike kang Tomas pagbutang sa iyang ngalan? Tinuod ba kaha kining ilang sulti-sulti nga ang nagbutang sa ngalan ni Mike mao si kanhi PDEA-7 regional director Yogi Ruiz nga suod nga higala ug alalay sa mayor? Tinuod ba usab kaha nga mitabang ang negosyanteng si Ding Borja, utrong suod sa mayor, nga mahinganlan si Mike ni Digong?

Kining pagpakita sa litrato ni Mike ug Digong, dili ba kaha kini senyales nga hapit na malimpyo ang ngalan ni Mike?

Kon mahibaw-an sa presidente nga tumo-tumo lang sa kampo ni Tomas ang pagbutang sa ngalan ni Mike, unsa kahay sunod mahitabo?

Alegre ni!