Nasupalpal si Joma Sison, lider sa National Democratic Front (NDF) sa iyang post nga na-coma si Pres. Duterte. Dili diay tinuod.
Usa ka adlaw human mi-post si Joma nga na-coma ang presidente, si Bong Go, ang special assistant ni Duterte, mi-post sa Facebook sa litrato ni Duterte nga naglingkod sa lamesa uban ang maanyag nga babaye. Matud ni Go, wala ma-coma si Digong, naa ra sa kama.
Hilig gyud og bakak nga propaganda kining mga rebelde. Si Joma giila nga maoy kinatas-ang lider sa NDF, Communist Party of the Philippines. Apan tua kini nagpauraray sa hayahay nga apartment sa The Netherlands, samtang ang mga sakop sa New People’s Army (NPA), nagkalisod sa kabukiran.
Sa speech ni Duterte atubangan sa mga mayor nga sakop sa League of Municipalities of the Philippines (LMP) meeting dinhi sa Sugbo niadtong Martes, gibugalbugalan hinuon ni Duterte si Joma. Nganong tuohan pa man nato si Joma nga wala naman kini masayod sa tinuoray nga sitwasyon sa Pilipinas?
Niadtong 1969 nahimo siyang chairman sa CPP. Apan human mapalagpot ang mga Marcos gikan sa Malacañang, si Joma miadto sa The Netherlands isip exile human siya gibuhian ni Cory Aquino gikan sa prisohan.
Didto sa maong nasud, si Joma gidakop tungod sa iyang kalambigitan gikan sa maong nasud sa tulo ka assassination dinhi sa Pilipinas – ang murder ni Romulo Kintanar sa 2003, murders nilang Arturo Tabara ug Stephen Ong niadtong 2006.
Sa adlaw pag-aresto kang Joma, ang apartment niya ug walo ka apartment sa iyang mga co-workers gipaubos sa search sa Dutch National Criminal Investigation Department.
Kon mopauli si Joma dinhi sa Pilipinas, daghang kaso iyang atubangon.
Apan ning mga panahona, gihingusgan sa nasudnong kagamhanan nga mahunong ang extortion activities sa mga rebelde pinaagi sa gitawag nila og “revolutionary taxes.” Kining ilang extortion maoy nagbuhi kang Joma didto sa abroad, samtang nagpait ang mga rebelde sa kabukiran.
* * *
Grabe nga nakapadako ni Mayor Tomas Osmeña sa balita sa dihang gihisgutan siya ni Pres. Duterte sa iyang speech sa LMP.
Sumala pa niya nga gi-guwardiyahan niya ang mga botos ni Duterte. Mao nga nasiguro ang kadaogan niya dinhi sa Sugbo. Gipanghambog usab ni Tomas ang Let’s DO it nga kunohay nagtabang ni Duterte sa kampanya.
Apan ang Let’s DO it natawo tulo ka semana sa wala pa ang eleksiyon, nga nianang mga panahona, kusog na kaayo sa survey si Duterte bisan walay usa nga mayor nga nagsuporta niya kay tanang mayor ug gobernador dinhi sa Sugbo nagsuporta kang Mar Roxas sa Liberal Party.
Ang nakapait pa gyud, ilang rason nga dili silang Duterte kay walay kuwarta ang grupo ni Duterte. Sa dihang mikusog na, suporta na kunohay sila.
Kon wala pa modaog si Duterte, mangangkon kaha si Tomas nga gisuportahan niya kini?