No man is an island

Ang hulmigas gagmay nga mga kinabuhing nagkamang sa yuta. Apan pagbantay, higanteng tawo, kay sa higayon nga matumban nimo ang pipila kanila, magpanon ang ilang kauban nga mokamang ibabaw sa mapangahason mong tiil ug mobalos pagpahit sa imong panit. Sakit mamaak ang hulmigas. Busa, patyon gyud sa napaakan.

Namatay ang hulmigas nga nagbilin og dalaygong pagtulon-an. Nga bisan pa sa ilang kagamitoy, oras nga usa kanila pasipad-an, magkahiusa gyud nga modapig ug makig-away aron ang ilang balay ug kaliwat kapanalipdan. Bahala nag ang pagbuhat niini, nagkahulogan sa ilang kamatayon.

Kitang Pinoy, nahisama ba sa mga hulmigas? Panahon sa ting-init kugihan silang magtambayayongay pag-alsa sa bukog sa isda, bukhayo o uban pang matang sa ilang pagkaon, diin ila ipundo sa ilang tagoanan aron pag-abot sa ting-ulan, dili sila magutman. Sila walay utok ug kasingkasing, pero makugihong  milihok ug nagtinabangay alang sa kaayohan nilang tanan. Atong mga lider sa Pilipinas ug kita mismo mga citizens, pareho ba sa hulmigas ang  kinaiya?

Subo palandongon, nga bisa’g dugay nang natapos ang eleksiyon, daghan gihapon ang nagsige’g pangampanya batok sa mga vision-mission for a good change nga hagbay rang gisugdan ni Tatay Digong.  Kon ang saad niyang  sulod sa unom ka bulan iyang papason ang illegal drugs wala matuman, kini tungod kay daghang oposisyon ang nagpabiling gahi sa pagsuporta sa iyang programa.

Ang problema, wala sa nagmando sa katawhan sa Pilipinas. Kon dili, sa matag usa nato, kinsa imbes magkasabot tanan nga moayuda, anaa gyuy moalkontra. Resulta, inay ang mga daotang sagbot ra untay mangaibot, hasta mga maayo nangalarot. Nahimong collateral damage nga napiksan sa bala sa kamatayon. Hinuklogi!  Kon honest pa unta tanang midula sa  illegal drugs, gikan sa users ngadto sa producers, diin boluntariyong mosurender ug magbag-o na sa ilang kinabuhi, unya maoy sundon ang makapahinuklog nga kinaiya sa hulmigas, segurado gayod nga makabangon na ang Pilipinas gikan sa hagbay ra kaayo natong pagkahagba sa kalisod.

No man is an island. Dili kaya ni Duterte nga solohon ra niya ang pagtrabaho alang sa nindot nga kausaban. Kinahanglan nga kitang tanan, magkahiusa, magtambayayongay ug magbinatiay sa pagtabang niya sama sa gihimo sa mga hulmigas.