Hulga kang Tomas

Gitug-an ni Cebu City Mayor Tomas Osmeña nga dunay grupo sa mga hitmen gikan sa Negros nga nagtinguha pagpatay niya.

Matud sa mayor ang ubang membro sa grupo mga sakop ra usab sa kapolisan.

Apan si Cebu City Police Office director Sr. Supt. Royina Garma miingon nga way report nga nadawat ang kapolisan mahitungod niini.

Sa dihang akong nahinabi si Garma sa The Freeman Conversations niadtong miaging semana, siya miingon nga negatibo ang maong report sigun sa gihimo nga validation sa mga sakop sa intelligence unit sa kapolisan.

Pero miinsister si Osmeña ug mihingalan sa pipila ka polis nga giingong membro sa hit squad.

Agi’g tubag sa pamahayag sa mayor, gihagit siya ni Garma nga ibutyag kinsa ang iyang tinubdan sa maong kasayuran.

Ug sama sa gipaabot, wala mosanong si Osmeña sa hagit. Dili sab kang kabasol sa mayor og dili siya motug-an ni Garma diin gikan ang iyang kasayuran.

Kini tungod kay matud sa mayor mga polis man ang giingong gisugo aron siya patyon.

Ang dili klaro kinsay nagsugo o nagpaluyo sa maong pagpanghulga ug unsay rason nga nagpahipi niini? Hinaut dili politika ang hinungdan.

Kun tinuod man ang maong hulga, usa sa mga posibleng hinungdan niini mao ang pasangil sa iyang mga kaatbang sa politika nga siya “protektor” sa illegal nga drugas.

Kon imong paminawon ang iyang mga kaatbang sa politika, si Osmeña mao kunoy protektor sa giilang drug lord nga si Jaguar Diaz.

Nahatagan og gibug-aton ang maong pasangil dihang si kanhi Justice Secretary Vitaliano Aguirre mihimo sa samang pamasangil ug nadugangan sa laing hitabo diin ang suod niyang polis nga si SPO1 Adonis Dumpit napatay sa kapolisan ug National Bureau of Investigation didto sa Bohol atol sa usa ka buy-bust operation.

Kon imong subayon ang dagan sa mga panghitabo hangtud nga mitumaw ang giingong hulga sa iyang kinabuhi, daw sa dunay koneksiyon sa drugas.

Ang pangutana tinuod ba gyud siyang protektor o giduhig lang ang iyang ngalan tungod sa politika?