Ayaw og tuo dayon sa mga pasalig kay daghan sa mga tawo ang nahimong bakakon kun imo dayong ihatag ang kinatibuk-an mong pagtuo sa ilang balaknong pagpamakak. Ang uban maglikay sa tinud-anay nga suliran. Mohatag sila og laing sulbad kunohay pagpakita sa ilang pagpakabana apan diay ang maong pagpakabana drama lamang aron magpabilin sila sa ilang nahimutangan.
Nindot ang ilang kahimtang ug kay nindot man ang ilang kahimtang nahimong mas nindot ang ilang pamati kon mogawas sila nga bayani sa programa nga ilang mugna dili tungod ug alang sa kinabag-an kondili tungod ug alang sa ilang panginahanglan apil na niini ang pagpatagad ug paghakgom sa gahum sa ilang pagkamaayong mogama og bidlisiw sa bakak nga paglaum. Wa koy laing nahimo gawas sa pagtugkad sa misteryo ning maong hitabo sa kasamtangan ug akong nakita nga tinuod uyamot nga las-ay ang kalibutan ug gani bisan ang giisip natong gamhanan ug mahigugmaon sa tanan walay laing nahimo gawas sa pagpaabot nga siya halaran og mga pagdayeg gikan sa gutom nga katilingban.