EDITORYAL - Hait na ang ngipon sa CITOM

Pipila ka adlaw gikan karon, ang mga traffic enforcer nga sakop sa City Traffic Operations Management (CITOM) mahatagan na og gahum pagsakmit og lisensya sa mga drayber nga makahimo og kalapasan sa balaod sa tukmang pagmaneho og sakyanan.

Atol sa sesyon sa Cebu City Council karong hapon, ang ordinansahon nga magtugot sa mga traffic enforcer pagsakmit og lisensya sa mga drayber bisan og wala’y Temporary Operators’ Permit (TOP) tukion sa mga konsehal sa siyudad.

Dugay na kaayo kining ordinansahon nga gisugyot nila ni Konsehal Eugenio Gabuya Jr. ug Konsehal Margarita “Margot” Osmeña, apan gilangan kini sa mga alyado sa Barug Team Rama diha sa City Council.

Karon nga mayoriya na sa mga konsehal ang alyado sa Bando Osmeña Pundok Kauswagan (BOPK), gipaabot nga hingpit na kining maaprobahan.

Angay gyud nga hatagan og dugang ngipon ang mga traffic enforcers aron nga mahadlok na ang mga drayber sa pag-abuso.

Sulod sa daghang katuigan, ang mga drayber kuwang og pagtahod ug bisan anaa sa ilang atubangan ang mga traffic enforcer, mohimo gihapon sila og salaod kay nasayod man sila nga ang mga sakop sa CITOM dili makasakmit sa ilang lisensya. Ang balaod naglatid nga masakmit lang ang lisensya sa drayber pinaagi sa pag-isyu og TOP.

Apan ang mga abogado sa dakbayan mitataw nga ang mga Local Government Units, sama sa Dakbayan sa Sugbo, makahimo pagmugna og ordinansa nga magtugot sa iyang mga traffic enforcer pagsakmit og lisensya sa drayber.

Katungdanan sa mga tagdumala sa LGU ang pagmentinar sa trapiko sa tagsatagsa nila ka lugar, mao nga angay lang nga hatagan og katungod ang ilang mga traffic enforcer pagsakmit og lisensya.

Kon makasakmit na og lisensya ang mga sakop sa CITOM, napanglantawan nga mahadlok na ang mga drayber nga mohimo og pag-abuso sa balaod sa trapiko kay kon masakmit ang ilang lisensya, sigurado man gyud sila nga makabayad dayon og multa, sama kon sila madakpan sa LTO.