Wala masayop si Mayor Tomas Osmeña sa iyang pag-ingon nga hinay kaayo karon ang mga sakop sa Philippine Drug Enforcement Agency (PDEA) sa paghimo’g kampanya batok sa gidiling drugas kon itandi nimo sa pagdumala kaniadto ni kanhi PDEA-7 Regional Director Yogi Felimon Ruiz.
Bisan ang kapolisan sa Dakbayan sa Sugbo nga ubos sa pagdumala ni Senior Superintendent Royina Garma hinay usab sa pagpanakop sa mga tawo nga nalambigit sa gidiling drugas. Pagkadaghang dakponon.
Ang nindot ninyong himuon taga PDEA ug CCPO, magbutang kamo og numero sa cellphone aron ang publiko anha makapadangat og report ug maoy inyong i-develop. Epektibo kaayo ni nga paagi kay ako lang, daghan kaayo og mga nadawat nga inpormasyon gikan sa publiko.
Kon kini maoy himoon sa kadagkoan sa kapolisan, sigurado ko nga epektibo kaayo ang ilang kampanya batok sa gidiling drugas ug madakpan gyud nila ang mga nalambigit niini. Apil sab nila nga lihokon ang mga nalambigit sa ilegal nga sugal.
* * *
Gitug-an ni Mayor Osmeña nga ang PDEA nihangyo kuno nga ilakip sa paghatag og honorarium gikan sa City Hall ang ilang mga civilian agents.
Husto kaayo ang gihimo sa mayor nga gibalibaran ang tinguha sa PDEA kay nganong hatagan man sila nga wala man sila’y kalampusan. Kon naa man gani, maihap lang sa tudlo. Dili na lang ko mosulti sa uban pa nakong nahibaw-an.
Ang ako bitaw’ng bata nga usa ka Registered Criminologist, nangunsulta nako kon maayo ba nga mo-apply siya sa PDEA. Ako siyang gipasabot nga dili maayo nga mosulod siya sa PDEA kay duol ra kaayo ang tentasyon.
Duna ko’y kumpare nga may mga kaila nga drug lord tungod sa negosyo niya nga pagpatanto og kuwarta diha sa mga buwangan, mitug-an gyud nako og mga sekreto.
Tambag nako sa regional director sa PDEA-7 nga mihulip ni Yogi Ruiz, pakita sab sa imong labok. Matandi man gud ang imong abilidad sa imong gipulihan.
Dili nimo kalikayan nga ang katawhan magduda nga ang kapolisan ug ang PDEA posibleng nagdawat og suborno gikan sa mga drug lords kay menos man sila og kalampusan sa kampanya sa ilegal nga drugas.
Sa panahon nila ni kanhi Cebu City police director Joel Doria ug PDEA-7 director Yogi Ruiz, nagpungasi ang kampanya ug kalampusan nila batok sa gidiling drugas.
Karon, wala pa’y gihimo sa naghitak nga problema sa ilegal nga drugas, wala pa gyud sila mohimo og kampanya batok sa gidiling mga sugal. Makapangutana kita kon unsa, wala ug tuo ang inyong dawat?