Gipasakaan gyud og kasong homicide si konsehal Jessielou Cadungog human pusila sa iyang bodyguard ang usa ka polis nga giingong nag-surveillance sa Barangay Tejero.
Si Cadungog ug ang iyang bodyguard nga si William Macaslang mag-atubang og kasong homicide tungod sa kamatayon ni PO3 Eugene Calumba nga sakop sa Parian Police Station.
Sigun sa balita, si PO3 Calumba gipusil ni Macaslang tungod sa pagtuo nga hitman kini nga buot mopatay kang Cadungog. Apan nasuta sa imbestigasyon nga si PO3 Calumba wala gani makabunot sa gitakin niining service firearms.
Si Police Regional Office-7 Director Debold Sinas miingon nga si PO3 Calumba nag-surveillance sa Barangay Tejero busa walay kamatuoran ang pangangkon ni Cadungog nga hitman ang maong polis nga buot mopatay niya.
Tingali gamiton sa kampo ni Cadungog ug Macaslang ang self-defense. Apan alang kanako, walay “aggression” gikan ni PO3 Calumba o sa kuyog niining police asset nga maoy nagmaneho sa motorsiklo.
Ako usab naglibog nganong gidiretso og pusil sa bodyguard ni Cadungog si PO3 Calumba.
Daghan ang mikuwestiyon sa presensiya ni PO3 Calumba sa Barangay Tejero. Gani, lakip na ang mga sakop sa media nahibulong usab nganong anaa si PO3 Calumba sa lugar nga naa man unta kini madestino sa Parian.
Kahibudngan pa ba diay na nga ang Tejero naila man na barangay nga gihugpaan og daghang klaseng kriminal, lakip na ang mga drug personalities. Ang Villagonzalo naa mahimutang sa Tejero, dili ba?
Wala ba sila mahibulong nga si Cadungog dugaydugay nahimong kapitan sa Tejero. Lumad usab sa Tejero akong higalang si Garry Lao, kanhi kauban nako sa The Freeman ug Banat News, kanhi number 1 councilman sa Tejero, ug karon mao na ang head sa Cebu Office for Substance Abuse and Prevention (COSAP). Apan kahibalo ang mga tawo nga wala masumpo ang ilegal nga drugas sa maong barangay.
Laing magkaproblema sa kamatayon ni PO3 Calumba mao si Konsehal Dave Tumulak tungod sa matud pa pagguba niini sa mga ebidensiya ug pagdala kang Michael Banua, ang police asset nga kuyog ni PO3 Calumba atol sa insidente.
Sumala pa ni Sinas nga gidala ni Tumulak ang mga ebidensiya gikan sa crime scene. Kon idayon, posibleng obstruction of justice ang atubangong kaso ni Tumulak.
Nganong gi-tamper man ni Tumulak ang mga ebidensiya? Unsa man ang gikahadlokan nila?
Wala ba masayod si Tumulak nga bisan unsaon niya og guba sa ebidensiya modagan gihapon ang kaso batok kang Cadungog ug Macaslang tungod kay positibo silang giila sa testigo nga mao si Banua, ang police asset.
Si Mayor Tomas Osmeña dali nga nakadepensa kang Cadungog. Matud niya siya moprotehir ni Cadungog. Dili na kini ikahibulong kay si Cadungog tawo man sa mayor.
Pero kun tinuod kining giingon sa kapolisan nga naa sa “drug watch list” si Cadungog, dili ba kana maapil og kaalanganin si Tomas niini? Karon nga nahibaw-an ang pagkatawo ni Cadungog, modupa pa kaha si Tomas niya o iya na kining iluwa?