Lipat-lipat lang

Kining Bando Osmeña Pundok Kauswagan (BOPK) nangliwat gyud ning partidoha sa iyang “inahan nga partido” nga Liberal Party nga hilig mamakak sa mga tawo.

Walo kuno ka mga kapitan nga alyado sa BOPK gitanyagan og P100,000 ngadto sa P1 milyon aron lang mobotar kang Niña Mabatid pagka-presidente sa Association of Barangay Council.

Kusog kaayo moreklamo, pero hasta diay sila nagbuhat sa ingon.

Sa wala pa ang eleksiyon sa barangay, nagtipon-tipon ang mga kapitan ug mga kandidato pagka-kapitan sa balay sa usa ka kapitan sa Sudlon ug didto si Franklyn Ong, ang suod ni Mayor Tomas Osmeña ug iyang kandidato pagka-ABC.

Sumala sa atong tinubdan nga si Ong mitanyag og P1 milyon sa kapitan nga mobotar kaniya.

Gani sumala sa atong tinubdan nga misulti si Ong nga bahala na og kinsay ilang mayor, basta iseguro lang siya nga ma-ABC.

Apan nganong desperado man ang kampo ni Tomas nga makuha ang mayoriya pinaagi sa pagseguro nga iyaha ang ABC president nga maoy molingkod isip ex-officio member sa konseho?

Nagung-ong ang multi-million nga Kawit Island Project. Mao kini ang paprotehian sa mayor mao nga naninguha kining malangkat ang mayoriya sa konseho.

Sa pagkakaron, bisan dili BOPK ang Sangguniang Kabataan president nga taga San Nicolas Proper, nagpabilin nga patas ang konseho human matudlo ni Presidente Rodrigo Duterte si Erik Miguel Espina isip konsehal sa siyudad, hulip kang James Cuenco nga gi-dismiss sa Ombudsman.

Si Bise Mayor Edgar Labella ang moboto kon adunay “tie” sa konseho. Mao nga pildi gihapon ang kampo ni Tomas.

Apan ang ako lang unta, hunahunaon sa mga kapitan nga human sila moboto kang Ong isip presidente sa ABC, lingi-on pa kaha kini sila sa kampo ni Tomas?

Para nako gamiton ra gyud kini sila karon nga kinahanglan ang ilang mga botos aron masuksok si Ong sa konseho. Ini’g human sa eleksiyon, ambot og tagdon pa ba kaha kini sila.

Nakaila na man sila kang Tomas. Madinumtanon ug walay permanente nga amigo, ug hilig mangaway.

Pananglit masuspenso si Tomas tungod sa daghang kasong nag-ung-ong sa Office of the President, unsa kahay mahitabo niining mga kapitana?

Kon ako niining mga kapitana, gamiton nila ilang hunahuna. Tigulang na ang mayor. Kinsay mosapupo unya nila pananglit unsay mahitabo niya sa maong mga kaso?

Akong awhag niining mga kapitan angay dili mahadlok. Tigulang na ang mayor. Kon mobarog lang kini sila kinsay ilang buot pilion isip lider nga walay mayor nga mogawong, masunod nila ang prinsipyo sa barangay affairs nga non-partisan.

Galing kay gigamit sa politika, unya ang nanggamit mao pay dagko og baba nga kunohay gibayran.