Hagit

Ang Consultative Committee nga gipangulohan ni retired Chief Justice Renato Puno misumiter na ngadto kang Presidente Rodrigo Duterte sa ilang draft sa Federal Constitution nga posibleng maoy mohulip sa 1987 Philippine Constitution, ug mag-usab sa Unitary, o Centralized nga gobiyerno sa Pilipinas ngadto na sa Pederalismo.

Apan sigun sa resulta sa survey sa tibuok nasud nga gihimo sa Pulse Asia niadtong Hunyo 15 ngadto sa 21, nga ilang gipagawas bag-ohay lang, sa 1,800 nga gipangutana, migawas nga 67 porsiyento ang supak nga usbon ang 1987 Constitution.

Duna la’y 18 porsiyento ang uyon, samtang 14 porsiyento ang wala pa makadesider.

Sa mao gihapon nga survey, migawas nga unom sa matag napulo ka tawo, o 62 porsiyento, dili uyon nga usbon ang sistema sa gobiyerno gikan sa Unitary, o Centralized, ngadto sa Pederalismo. Ang survey nagpakita usab nga misaka og singko porsiyento ang gidaghanon sa mga misupak nga usbon ang Batakang Balaod, samtang mikunhod usab og singko porsiyento ang mga tawo nga miuyon.

Ang Pulse Asia survey nagpakita nga ang tanang class sa katilingban, gikan sa labing dato ngadto na sa labing pobre, supak gyud sa pag-usab sa Batakang Balaod ug sa sistema sa panggobiyerno.

Mao ni karon ang dakong hagit ni Presidente Duterte kon unsaon niya pagdani ang mga tawo nga suportahan ang iyang laraw. Niining panahona, gikinahanglan ni Presidente Duterte ang ‘kinabaw’ nga diskarte, o doble kayod nga pagpaningkamot, kon gusto man gyud niya nga mausab ang atong Batakang Balaod ug ang sistema sa gobiyerno sa Pilipinas.

Gawas sa pagpasabot sa katawhan kon unsa ang Pederalismo, gikinahanglan usab sa gobiyerno ang paghunong sa pagpalutaw sa scenario nga “No Election” kay makapasamot lang kini nga ang katawhan dili na mosuporta sa pag-usab sa Konstitusyon tungod sa mga pagduda.