Nitiyabaw ang pipila ka sakop sa Grains Retailers Confederation (GRECON) nga gilisudlisod sa National Food Authority (NFA) ang pagpamaligya sa ilang stalls sa kamerkadohan sa nangabot nga NFA rice gikan sa Vietnam ug Thailand. Nagduda sila nga gituyo sa NFA ang paglangay sa paglab-as sa ilang accreditation.
Nitug-an sila sa DYAB Radyo Patrol nga usa sa panginahanglan sa paglab-as sa lisensiya sa NFA accredited retailers mao ang inspeksiyon sa NFA sa ilang stalls sa kamerkadohan.
Apan wa mag-apura ang taga NFA sa pagsusi sa ilang mga tindahan nga hagbay ra nga gimingaw sa baratong bugas humay.
* * *
Gihulagway niya nga dili makiangayon ang gisubli-subli nga pahibawo sa NFA nga usa pa ka NFA retailer ang nakapalab-as og lisensiya kay nakapatumaw sa kahigayonan nga wa sila katuman sa mga panginahanglan o nga kuwestiyonable ang ilang pagpamaligya sa NFA rice.
Nipasabot sila nga wa malab-as ang NFA acceditation sa kasagaran sa mga sakop sa GRECON hangtud karon kay wa magtagad ang lokal nga kadagkoan sa NFA pag-inspeksiyon sa ilang stalls. Ilang nahibaw-an nga karon pa nga semanaha sugdan ang pagpakatap sa NFA inspectors.
* * *
Nabalaka ang mga sakop sa GRECON nga among nahinabi nga mahimong nanimawos si NFA 7 Regional Director Procopio Trabajo II sa ilang grupo tungod sa pagsumiter nila og mga dokumento sa pagpasimang sa NFA rice ngadto sa commercial rice traders kinsa namaligya niini ngadto sa mga konsumidor sa mas taas nga presyo.
Si GRECON Cebu Vice President Celsa Bernales ang nipakita og mga hulagway sa giingong maniobra sa NFA rice atol sa imbestigasyon nga gilusad sa Cebu Provincial Board niadtong Marso ning tuiga.
* * *
Opisyal sa NFA-7 nga nihangyo sa DYAB Radyo Patrol nga dili magpaila nipasalig nga wa nila apikiha ang GRECON.
Igo lang sila nga naneguro nga dili na masubli ang gihimo niadto sa mga negosyante sa pagbaligya sa NFA rice isip commercial rice.
Matud nila nga dili sab hingpit nga magsalig ang NFA sa accredited retailers nga mga sakop sa GRECON kay gisugo sila sa Malakanyang nga ang baratong bugas humay adto ipamaligya sa mga dapit nga nahimutangan sa labing kabus nga mga konsumidor, sama sa beneficiaries sa Pantawid Pamilyang Pilipino Program (4Ps).
* * *