Hulyo 8, 2018: Ika-12 nga Domingo sulod sa tuig
Mga Pagbasa: Ez.2;2-5/Sal. 123/2 Cor. 12;7-10/Mk. 6;1-6
Tinuod kada usa nato buot mopadayag sa atong kaugalingong panahom aron sa uban pamation. Apan subo palandungon nga dili tanan maminaw, bisan kon sayod sila nga ang imong hunahuna bulawanon.
Ang pangutana mao: Unsay imong credentials? Ingon niana ka ba kadato? Kasikat? Kagwapo, o kagwapa? Bisan gani ang mga wa’y hinungdang mga sugyot mahimong undanon, labi na kon makabugto og garter ang imong talidhay ug pahiyom.
Mao kini ang nahitabo sa atong Ginoo. Wa siya tuohi sa iyang kaugalingong katawhan. Kinsa ra gud tawon siya? Dili ba anak ra siya sa panday? Mao nga ang maong kakuwangan sa pagtuo maoy babag aron mahitabo ang milagro.
Ning panahon karon sa tumang kamadudahon, mahimong malisud ang paglambo. Wa’y pagtuo ug pagsalig sa usa’g-usa. Daghan sa ato ang nadagma sa pagtuo nga mubo ra og IQ ang uban.
Apan hinumdomi higala, ang Dios mahimong mosulti ug mopadayag sa halawom nga mensahe ginamit ang yano nga mga tawo ug yano nga mga pinulongan.