Your God is stupid, my God is perfect
Mao kini ang pagkomparar ni Presidente Digong Duterte sa Ginoo diha sa pagpanudlo sa kaparian sa mga Romano Katoliko batok sa giila niya nga Ginoo.
Sa diskurso ni Duterte, iyang gisingit pag-estorya ang pag-umol sa Ginoo nilang Eba ug ni Adan, ang una ta nga ginikanan, diin naghimo siya’g kaugalingong version unsay ilang gibuhat nila.
Human kan-a sa duha ang mansanas, matud sa presidente nga malice was born. Midugang si Duterte nga ang magtiayon kuno ang nag-tsuktsak ug nganong pagkatawo sa anak, may sala na kining daan nga gitawag og original sin? Matud pa ni Duterte nga, God is lonely, mao nga nagbuhat Siya’g paraiso para nilang Eba ug ni Adan nga mao ang kalibutan. Dinhi pa lang, makita nga wala gyud matuhog ni Duterte ang kinatibuk-ang unod nga naglumlom sa sabakan sa bibliya.
Ang paraiso, paraiso! Dili puwede nga ang kalibutan mahimong paraiso kay sa sinugdanan, ang gipuy-an nilang Eba ug Adan mao ang paraiso. Pero, dihang nakasala, gipalayas ang duha sa Ginoo ug giingnan:
“Go to the world and multiply!” Sukwahi kaayo sa gisulti ni Duterte. Tingali, ang gibasa niyang bibliya lahi sa Katoliko. Mao nga grabe siyang nakasaway: “Your God is stupid. My God is perfect!”
Ako lang klarohon. Bisa’g unsa pa’y imong relihiyon, usa ra’y Ginoo sa tanan. Nato, isip tawo, walay perpekto. Ang Ginoo ra gyud. Ang kasingkasing sa Ginoo puno sa gugma. Gani dihang gilansang Siya sa krus, unya gibugalbugalan sa mga Hudeyo, gugma ang Iyang gibawos!
Mihangyo Siya sa Amahan nga Pasayloa Sila Kay Wala Masayod sa Ilang Gibuhat!” Dinhi gipakita sa Ginoo unsaon nato pagsunod ang Iyang sugo – ‘Gugma’!
Apan gituman ba ni Duterte ang sugo sa Ginoo? Kon wa niya tumana, kinsa man ang angay balikason og ‘stupid’? Ang Ginoo diay? Dili ba, angay nga ang katawhan, kinsa sama niya kusog kaayong mamalikas, diin usahay maapil pa ang Ginoo?
Nalipay ko nga ang Ginoo ni Duterte perfect. Pero sa samang higayon, naguol ko kay siya dili perfect! Nalimot si Tatay Digong nga kon giingnan niya ang simbahan ug kaparian nga Your God is stupid, sama ra nga ang Ginoo mismo maoy iyang gibalikas!
- Latest
