EDITORYAL - Depende ra sa mayor

Ang mayor sa usa ka dapit dako kaayo og mahimo aron nga molihok ang kapolisan ug motuman sa mga tahas nga gisangon kanila, ilabi na ang pakigbatok sa mga ilegal nga kalihokan. Tungod kay ang mayor giisip man nga “deputy” sa National Police Commission, may gahum sila pagsuperbisar sa kapolisan sa ilang lugar.

Klaro kaayo nga gianugonan si Mayor Tomas Osmeña kang Senior Superintendent Joel Doria nga gikuha na sa kadagkoan sa Camp Crame pagka direktor sa Cebu City Police Office (CCPO) aron hatagan og bag-ong katungdanan. Giisip ni Mayor Osmeña nga “best police chief” si Doria ug napanglantawan niya nga mahimo kini nga umaabot nga PNP Chief.

Angay’ng hatagan ni Osmeña sa tibuok niyang suporta si Senior Superintendent Royina Garma nga maoy gitudlo sa Camp Crame nga puli ni Doria dinhi sa dakbayan. Unang higayon pa nga ang dakbayan sa Sugbo nakabaton og hepe sa kapolisan nga usa ka babaye.

Kon si Osmeña ug Garma magtinabangay sa gimbuhaton pagpalambo sa kahusay ug kalinaw, ingon man ang pagsumpo sa mga ilegal nga kalihokan dinhi sa dakbayan, sigurado gayud nga sila magmalampuson. Isip deputy sa Napolcom, mapugos ang kapolisan pagtuman sa mga sugo sa mayor.

Karong bag-o, nakita ang gahum sa mayor diha nga gibadlong niya ang kapolisan sa Waterfront Police Station nga sa dugay’ng katuigan migamit sa karsada atubangan sa ilang police station isip parking area sa ilang mga sakyanan, bisan og duna sila’y parking area sa kilid.

Ang hulga ni Osmeña nga putlan sa ilang City Hall honorarium, imbargohan sa police service vehicle ug dili hatagan og fuel assistance ang kapolisan sa Waterfront kon mopadayon paggamit sa karsada isip parking area, maoy nakapugos sa kapolisan pagtuman sa mando sa mayor. Nagpasabot nga kon ang mayor momando sa kapolisan nga paspasan ang paghimo’g kampanya batok sa ilegal nga drugas, ilegal nga sugal, sama sa illegal swertres ug gambling machines, sigurado nga ila kining tumanon.