“Kon motabang lang ta kon dunay sobra,” nipasabot si Msgr. Ruben Labajo sa iyang wali sa Santos nga Misa nga nibukas sa Grand Halad sa Kapamilya, ang labing dakong piyesta sa libreng mga pangalagad sa Sugbo, niadtong Sabado, Hunyo 30, sa Main Campus sa Cebu Technological University (CTU), “kagamay ra kaha sa matabangan.”
Giasoy niyang sugilanon sa kabos nga inahan nga nahatagan ni Mother Teresa og bugas.
Bisan luya kay pila ka adlaw nang way kaon, gibahin sa inahan ang bugas ug gihatag ang katunga ngadto sa ilang silingan nga nagutman sab.
* * *
Niingon si Msgr. Labajo ang talagsaon nga paghinatagay sa mga kabos maoy nakapalapad sa Grand Halad sa Kapamilya human sa kapin na sa dekada.
Matud niya ang gamay’ng tampo sa matag manggihatagon nga Sugbuanon nga natigom matag Hunyo ug Nobiyembre nakatabang sa mas daghan nga mas nagkinahanglan.
Niawhag siya nga ipadayon ang pagtinabangay bisan di matabangan ang tanan.
Nipasabot siya nga di angay’ng maluya sa pagtabang bisan kon ang atong tampo maisip nga usa lang ka lusok sa dakong dagat.
Kay ang daghang lusok maoy nakahimo sa dakong dagat.
* * *
Sa way pananghid ni Msgr. Labajo, nangolekta ang mga sakop sa Association of Concerned Texters (ACTers) gikan sa mga nanimba atol sa paghalad sa Misa.
Wa niya dawata ang natigom nga kuwarta ug nisugyot nga ihatag ngadto sa labing nagkinahanglan.
Nahukman namo nga ipalit og init nga pan ang kapin sa libo ka pesos nga koleksiyon.
Labihang daghana sa nakakaon sa labing kabos nga mga pasyente sa libreng medical, dental ug optical services.
* * *
Gipabawonan ko sa akong asawa sa lamian niyang scones aron di magutman sa pagpangadlawon og pangandam sa Grand Halad.
Tungod sa kadaghan na sa mga pasyente nga nanambong sa Misa, nakalimtan nakong pinutos nga scones sa usa sa mga lamesa sa Kasadya Gym sa CTU.
Atol sa pangalawat, nisuway ko og subay sa akong bawon.
Dihang wa dayon makit-i, nanghinaut kong nakuha ug nakaon sa mas gigutom.
Hangtod nga akong nakit-an nga wa hilabti sa lamesa nga nahimutangan sa hamtong nga babaye ug sa iyang mga apo.
Kinsay nag-ingon nga way kaligdong ang labing kabos sa atong katawhan?
* * *