Hiyas sa himsog nga pagkatawo (1)

Kanunay kita nga makadungog og mga komento mahitungod sa usa ka tawo, nga nagbaton og maayong personalidad, o kaha iya pa kini nga ugmaron.

Ang pagkatawo ug personalidad, maoy kombinasyon sa tanang ginagmay nga kalangkoban (factors) aron paghimo og aksiyon gikan sa naandan nga gawi nga nakarehistro sa utok.

Sa pagbaton og hiyas sa himsog nga pagkatawo, aduna kini rekisitos, o papel nga hashasan ang kaugalingon sa tawo nga mohimo niini. Ang bugtong nga yawe niini, mao ang pagbuhat og kaangayan sa tanan nga walay gipinig, pinaagi nga umolon ang mga elemento niini sa kada adlaw.

Makita ang hiyas sa himsog nga pagkatawo, ang mahimut-anon ug mahinangpon kanunay, dili dali maputong, o masuk-anon, nga motugot sa mga tawo, nga makatugkad sa katin-awan, sa tumong ngadto sa pagsinabtanay. Sagad sa ingon niini nga  matang sa pagkatawo, nagbaton og maayong kinaiya nga masinaboton ug mapailobon.

Kon kini atong mapakita, indikasyon usab kini nga kita anaa sa kahimtang sa himsog nga panghunahuna, nga maoy mogiya kanato aron palig-onon ang kompiyansa sa kaugalingon. Ang nakabentaha niini, kay kini maghatod kanato sa katumanan ug sa mabulokon nga kinabuhi.

Agi’g pagpahiamgo, ania ang pipila sa mga hiyas sa himsog nga pagkatawo;

* Adunay abilidad sa panginlabot ug pagsagop sa katilingbanon nga kalihokan sa palibot.

*Maminaw sa ubang opinyon ug mopatunga isip usa ka maayong magtatambag.

*Maalagaron sa mga butang nga makapabuhi sa ubang paglaum.

* Dili managana nga mosulay nga himuon ang kutob sa mahimo alang sa tanan.