Kini ang mahitabo kon ang matag tawo malumsan sa gahum. Kon dato ka, ipaagi una og daghang proseso sa legalidad, apan kon kabus ka gani, ipaagi ka dayon sa hinanaling pagpanglutos.
Sa laktod, daghan ang buot nga mahimong gamhanan aron sa katawhan makahimo og hinanaling katagbawan. Subo palandungon nga ang kalibutan nahimong ingon niini na lang gyud.
Subo palandungon kon nganong ang kalibutan nahimong takilid diha sa kinabuhing tawhanon. Ang tanan nahimong haguka ug ang anaa sa gahum nahimong arogante ra kaayo bisan gani diha sa pagpatuman sa balaod.
Panid-an nato unsay labok
Karon nga bag-o na ang direktor sa kapolisan dinhi sa Dakbayan sa Sugbo, ug sinaligan pa gyud siya ni Presidente Rodrigo Duterte, molambo na kaha ang kampanya batok sa ilegal nga mga sugal?
Mao kini ang atong panid-an. Mora’g una pa kining higayon nga ang kapolisan dinhi sa siyudad sa Sugbo pangulohan og babaye nga opisyal.
Siya mao si Supt. Royima Garma, ang hepe sa PNP Criminal Investigation and Detection Group (CIDG)-7.
Dakong hagit ni Garma kon mosugod na siya pagdumala sa kapolisan dinhi sa Dakbayan sa Sugbo kon madutlan ba niya ang mga nag-operate sa illegal swertres nga giingong taga Davao City ra ba ang uban kanila.
Diha nga gidestino sa Sugbo si Garma kaniadto, gituohan nga may tahas siya kalabot sa inilang tawo nga giingong nalambigit sa drugas.
Sagdi lang, saligan ra nato si Supt. Garma nga bisan og siya babaye, apan takus siya nga mopalihok sa kapolisan ug mopitol sa pipila niya ka sakop nga klaro kaayo kon nganong nagkiyugpos lang ug wala mohimo’g kampanya batok sa mga illegal nga sugal.
Para ni Senior Supt. Joel Doria, salamat sa imong mga pagsanong sa akong mga request kaniadto nga misangpot sa malampusong operation.
* * *
Nakahimo og dakong sipyat si Tejero Barangay Kapitan Jingjing Cadungog nga gitugyan dayon niya kang SPO1 Adonis Dumpit ang iyang kalibre 45 nga pistola tungod lang kay gipalit kuno sa polis, bisan og wala pa maaprobahi sa Camp Crame ang pagbaligya.
Naghuwat unta si Cadungog nga ang armas marehistro na sa ngalan ni Dumpit usa pa niya kini itugyan ngadto sa nagpalit.
Ingon niana ang gilatid nga lagda sa Republic Act 10591, ang bag-ong Firearms Law.
Pananglit ang armas nga gipanag-iya ni Cadungog, nga gihatag niya kang Dumpit bisan og wala pa gani kini makaimpas sa pagbayad, nalambigit og krimen, manubag niini ang tag-iya sa armas.
Sigurado ko nga ang NBI mohimo gyud og pakisusi pinaagi sa pagpahigayon og ballistics examinations sa armas nga iya ni Cadungog ug nakuha gikan sa napatay nga si Dumpit, ug itandi kini sa daghang mga krimen dinhi sa dakbayan.
Ang kuyaw kon dunay mga krimen nga masuta nga ang armas nga gigamit mao ang armas ni Cadungog. Hinoon, miingon na man si Cadungog nga iyang atubangon ang imbestigasyon.
Kamo diha nga nagplano nga mobaligya sa inyong armas, pagpangutana gyud mo sa mga nakahibalo sa balaod, aron nga dili kamo masugamak sa problema.