Haskang paita sa Simbahang Katoliko. Human gibalikas ang tibuok institusyon, human gipasanginlan nga manlulugos ug kawatan ang iyang kaparian ug mga obispo, ug human nganli og amaw ang iyang Ginoo, karon gipasabot nga angay ra nga mosabot sa tanang insulto kay nahilambigit diay sila sa mga plano sa pagpalagpot ni Presidente Rodrigo Duterte gikan sa katungdanan.
Human gibalibaran sa Malakanyang nga dili mahitabong mangayo og pasaylo si Presidente Duterte sa iyang mga pakauwaw sa labing mahinungdanon nilang pagtulon-an, ang kadagkoan sa simbahan mahimong mao pa diay ang papangayuon og pasaylo sa presidente.
* * *
Wa pa ba kaha matagbaw sa wa’y kinutobang pagpanamastamas sa kadungganan sa tibuok institusyon tungod sa atraso sa pipila ka pari, gihidhiran ni Presidente Duterte og asin ang gisigehan niya’g wiwi nga samarang relasyon uban sa simbahan pinaagi sa pagtudlo og mga representante nga pulos nanghimaraot sa institusyon:
Si Boy Saycon uban sa iyang kinaham nga pasangil sa mga konsabo batok sa presidente; si DFA Undersecretary Ernesto Abella nga pastor sa laing relihiyon; si Presidential Spokesperson Harry Roque nga niinsistir nga gilugos og pari ang batan-ong Duterte; ug si Cabinet Secretary Jun Evasco nga nitalikod sa simbahan ug nag-komunista.
* * *
Nikumpisal na si Presidente Duterte nga paukyab ra diay tong iyang sulti. Apan ang iyang mga tigpamaba padayong namugos og mas lawom nga katin-awan:
Para ni Presidential Legal Counsel Salvador Panelo, pasundayag kadto sa labing taas nga matang sa spirituality;
Parang Roque, wa pa kahilwas ang presidente sa nahiagomang panamas-tamas kay wa pa mangayo og pasaylo ang simbahan niya; ug
Para ni Saycon, igo lang gipanalipdan sa presidente ang iyang pamunoan gikan sa mga puwersa sa kangitngit.
* * *
Ang labing tukma nga katin-awan sa pagkuwestiyon ni Presidente Duterte sa Ginoo mahimong gipalili nato sa iyang anak nga si Davao City Mayor Sara Duterte:
Dili angay’ng tuohan ang iyang amahan kon magpatuga-tuga na og hubad sa balaang kasulatan sa nagkalainlaing relihiyon, nga maoy usa sa labing dakong kahadlok bisan sa iyang mga suod:
Ang hapit inadlaw niyang mga pakigpulong, gawas nga mohikaw niya sa kahigayonan sa pagpamalandong sa mas malungtaron nga mga panginahanglan sa nasud, makaaghat pa gyod niya pagpabuhagay sa dili na tarong nga mga panghunahuna.
* * *