Mahimo ba nga mo-execute og last will ang magtiayon?

Dear Atty. Divine,

Ang among tatay ug nanay mga tiguwang na. Lima mi nga ilang anak ug gusto unta nila nga maghimo og Last Will and Testament alang sa ila unyang kabilin, aron kuno dili mi mag-away kon wala na sila.

Gusto ni tatay ug nanay nga mo-execute silang duha og Last Will, apan usahon lang kuno nila sa usa ka Last Will.  Ang akong pangutana kon legal ba nga mo-execute sila og joint Last Will? Daghang salamat. —Leona

* * *

Dear Leona,

Base sa Art. 818  sa atong Civil Code, hugtanong gidili niini  ang joint Last Will and Testament.

Kinahanglan nga Individual gyud ang pag-execute niini bisan pa kon sila magtiayon. Buot ipasabot nga ang imong nanay mo-execute og iyang Last Will, samtang ang imong tatay mo-execute sab og iyang Last Will and Testament.

Kay kon usahon nila ang ilang Last Will, dili kini valid ug dili kini makalusot sa korte inigpa-probate niini.

Busa mas maayo nga imong sultian ang inyong ginikanan kalabot niini ug kon mo-execute sila og Last Will, mas maayo nga moduol sila og lawyer aron sila magiyahan kay adunay mga rekisitos ang atong balaod aron kini mahimong valid. Thanks and God bless. -Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.